Sali Berisha u bën thirrje numëruesve dhe vëzhguesve të PD-ASHM aty ku procesi i numërit të votave vazhdon ende, që të jenë më vigjelentë për çdo parregullësi, përfshirë tonalitetin ndryshe të ngjyrës së fletëve të votimit.
“Mesazh për shpërndarje urgjente tek çdo numërues dhe vëzhgues i yni! Numëruesit tanë në Njesinë Administrative Nr 9 në Tiranë kanë gjetur fletë votimi me ngjyra të ndryshme nga njëra tjetra.
Çdo numërues dhe vëzhgues i yni të shohë me shumë vëmendje dhe të evidentojë fletët e votimit me ngjyra të ndryshme nga njëra tjetra, të ndërpresë menjëherë numërimin dhe të njoftojë kandidatin ose drejtuesit tanë. Përshëndetje të përzemerta! Sali Berisha”, thuhet në mesazh.
Mesazhi i kreut të Partisë Demokratike vjen pas rastit të Agron Shehajt me disa vota të Partisë Mundësia (në Njësinë 9 në Tiranë), të cilat u kontestuan përkohësisht, pasi disa prej tyre kishin ngjyrë më të theksuar nga të tjerat.
