Ish-kryeministri Sali Berisha gjatë fjalës së tij në parlament këtë të hënë ka kërkuar një komision hetimor parlamentar për deklaratën publike të prokurorit të shkarkuar nga vettingu, Arjan Ndoja që sipas liderit historik të demokratëve ka thënë që ka regjistruar kreun e qeverisë me banditë.
Berisha tha se pasi Ndojës i është bërë atentat, Rama e ka sulmuar atë në mënyrë të çuditshme. Prandaj ai thotë se duhet hetim për të hedhur dritë nëse Rama fshihet pas atentatit apo se çfarë fshihet pas tabulateve të denoncuara nga Ndoja.
“Kërkoj një komision hetimor parlamentar për dëshminë publike të prokurorit Arjan Ndoja që thotë se e kam të regjistruar kryeministrin duke komunikuar me banda dhe banditë. Mbi Arjan Ndojën u shkrehën bateri kallashnikovi. Nuk jam kurrë që të vriten njerëz, por kur ai ishte në breshëri, Rama në mënyrë të çuditshme lëshonte breshëri kundër tij. Vetëm sa nuk thoshte: medet që shpëtove, sa keq që shpëtove. Pra kishte gisht Edi Rama pas atij atentati? Kjo do hetim. Çfarë ka në tabulatet që denoncon prokurori Ndoja me guxim? Kjo do hetim dhe nuk e mbron dot njeri Edi Ramën nga këto. Nuk janë vetëm këto tabulate që kompromentojnë Edi Ramën dhe ministrat e tij. Telefoni i famshëm “BQ” është në analizë. Po analizon cili është i këtij dhe cili i atij. Po zbardhen mesazhet e tyre”, tha Berisha.
/a.r
