Sali Berisha duket se po e çon opozitën drejt protestave, pas humbjes së thellë të zgjedhjeve, të cilat ai i konteston si të manipuluara nga kundërshtari.
Analisti Neritan Sejamini, i ftuar në emisionin “Të Paekspozuarit” në MCN TV, thotë se rruga e protestave partiake nuk të çon askund, siç është provuar në mënyrë të vazhdueshme me protestat e Partisë Demokratike, ndaj ato janë “energji e humbur” dhe nuk mund të sjellin rrëzimin e Edi Ramës.
Sejamini shtoi se opozita mund të përmbysë mazhorancën vetëm duke krijuar një model krejt të kundërt nga ajo, për të frymëzuar njerëzit.
“Gracka ku po bie opozita, duke u marrë me armikun, nuk reflekton për veten. Unë sa i përket protestave, e kam thënë gjithmonë, Rama nuk rrëzohet me protesta. Edi Rama rrëzohet me protesta popullore, jo me protestat e PD. 100 mijë shqiptarë në shesh e rrëzojnë Edi Ramën, por a i nxjerr dot PD? Jo. Nuk rrëzohet Rama me protesta partiake.
PD është duke i hyrë një rruge të sprovuar që nuk të çon asgjëkundi.
PD e fiton betejën me Ramën duke ofruar një alternativë reale, me figura të ndershme dhe të aftë, për të cilët nuk ka dyshime në publik.
Opozita do të mundohet të bëjë protesta, por do t’i shuhen. Duke humbur energji me protesta, po harron të bëjë gjënë kryesore, të mësojë nga kjo që ndodhi dhe të ndryshojë”, deklaroi Sejamini.
/a.r
