Forca regresiste duan ta përdorin reformën në drejtësi. Kështu është shprehur nga foltorja e Kuvendit ish-kryeministri Sali Berisha, pasi ka ironizuar Ramën si bashkëautor të golit ndaj Rumanisë dhe njeri të sukseseve imagjinare.
Në fjalën e tij, Berisha tha se kryeministri do ta ketë nën kthetra drejtësinë, ndërkohë që u shpreh se Reforma është jetike.
Ai e ka cilësuar kryetarin e Komisionit të Posaçëm si bashkëkryetar të Partisë Komuniste, që siç tha Berisha “është nën kthetrat e Edvin Kristaq Ramës”.
“Drafti i Xhafajt e vendos Ramën kryeprokuror. Ai draft asgjëson pavarësin e drejtësisë dhe Venecia e rrëzon atë. Opozita është sot në mbrojtje të qytetarëve” – tha ish-kryeministri.
Sipas tij, drafti i përgatitur nga opozita është i tillë që asnjë ndërkombëtar nuk e ka rrëzuar.
“Drafti jonë quhet draft armik sepse opozita për Ramën është armike. Nuk heqim dorë nga përpjekja jonë titanike për t’u dhënë shqiptarëve reformën që presin. Këtë proces nuk mund ta bëjnë të huaj. Venecia thotë se Vetingu është pjesa më e ndërlikuar e Reformës” – tha Berisha.
(java / r.a)
