Ish-Kryeministri Sali Berisha ka shkuar këtë të hënë në selinë e Partisë Demokratike për të zhvilluar një mbledhje me të gjithë anëtarët e Komisionit të Rikthemelimit të partisë, forum që u zgjodh nga Kuvendi i datës 11 Dhjetor.
I shoqëruar nga Evi Kokalari, mbështetës, anëtarë dhe deputetë të Partisë Demokratike, Sali Berisha ka thënë se Lulzim Basha është de facto i shkarkuar, e që sipas tij, do të marrë vendimin përfundimtar të shtunën e 18 Dhjetorit në referundimin që ka caktuar Kuvendi i 11 Dhjetorit.
Berisha u shpreh se Basha dhe anëtarët e partisë të cilët e mbështesin janë të lirë të qëndrojnë si fraksion brenda PD-së.
“Siç e shihni, janë anëtarët e Komisionit të Përkohshëm të Partisë Demokratike të zgjedhur në Kuvendin e fundit të cilët kanë ardhur të vendosen në selinë e demokratëve dhe të diskutojnë për problemet e rëndësishme të së ardhmes. Tani po ngjitemi sipër. Kjo parti nuk përjashton pakicën. I ka dhënë mundësitë pakicës të qëndrojë po të dojë si fraksion. Deputeti Basha do të jetë anëtar i grupit parlamentar. De facto është i shkarkuar nga Kuvendi por në respekt të anëtarësisë më datën 18 ata do shprehen për deputetin Basha. Në zyrën e Bashës nuk kam punë. Sot vijmë këtu për të bërë një mbledhje dhe deputeti Basha deri në datën 18 mendoj të reflektojë për vendimin e Kuvendit. Sot futem si njëri nga anëtarët e këtij komisioni që funksionon me kolegjialitet. Çmenduria e peng Bashës për karriget, i ka marrë të gjitha karriget në zyrën e tij se nuk i mjafton karrigia e vetë”, tha Sali Berisha.
Sali Berisha dhe anëtarët e tjerë të Komisionit të Rithemelimit të PD po zhvillojnë mbledhje në një prej sallave të selisë blu. Ndërkohë, në të njëjtën kohë në seli është edhe Lulzim Basha i cili po zhvillon mbledhje me grupin e punës për zgjedhjet në FRPD në një tjetër zyrë.
/a.r
