Ish-Kryeministri Sali Berisha ka vijuar sot akuzat ndaj Kreut të Kuvendit Ilir Meta për atë që ai pretendon të jetë afera korruptive më e madhe në historinë e Shqipërisë. Bëhet fjalë për kontratën mes CEZ-DIA, ku sipas Berishës, Meta ka marrë ryshfet nga administratori i DIA Kastriot Ismailaj.
Por sipas ish-Kryeministrit, vjedhjen më të madhe e ka bërë Rama, lidhur me pagesën prej rreth 98 milionë eurosh që qeveria shqiptare i bëri CEZ për të shmangur arbitrazhin ndërkombëtar.
“Zotëria i cili është unik këtu për tu bërë dëshmitar me dokumente të rreme, për të pasur përpara një akt normatil të Adil Carcanit dhe ta paraqitur si të Sali Berishës. CEZ-i dua t’u them këtu shqiptarëve, është vjedhja më e madhe, është plackitja më e madhe që u ka bërë ndonjëherë një kryeministër, Edi Rama. Ky është korrupsioni më i madh në historinë e vendit. Këto ditë mediat kanë zbuluar një akt tjetër normativ, ku njëra nga kompanitë e kontraktuara nga vetë CEZ ka dhënë ryshfet Ministrit të tij të Jashtëm. Ai ka negociuar për të me Kastriot Ismailaj. Deklaroj këtu se Ilir Meta si Ministër i Jashtëm nuk ka pasur asnjë detyrë për të negociuar me CEZ. Me CEZ ka qenë i ngarkuar ministri i tij Edmond Haxhinasto. Më i keqi në këtë mes është ai që gjobiti me 1100 euro çdo shqiptar, Edi Rama.” u shpreh Berisha
