Ish-ministri Neritan Ceka ka bërë mbrëmjen e djeshme një rrëfim ndryshe në emisionin ‘Opinion’. Ai kujtoi ndër të tjera edhe takimin e vështirë të 1997-s me Presidentin e asaj kohe, Sali Berisha. Ndonëse ishin kundërshtarë të fortë politikë, Ceka e kujton kështu bisedën me të:
“Mu drejtua, siç e ka, Neritan, Preç ju kam sulmue, por e kam bërë për lojë politike. I thashë ore doktor, i lemë këto hyrje sepse po na ikën vendi, nuk kam hall tjetër. Unë nuk e kam ndërmend të iki nga Shqipëria prandaj hajde të gjejmë një zgjidhje si do dalim. Tha mirë.
U ulëm dhe biseduam. I thashë pa zgjedhje të parakohshme nuk ka rrugëdalje, do bëjmë zgjedhje të parakohshme, të vijë një qeveri tjetër dhe gjejmë një rrugëdalje, sepse vetvetiu ulen tensionet. 4 ditë përpara ai ishte rizgjedhur president. Tha mirë…”, tregon ndër të tjera Ceka.
Ai kujton më tej se marrëveshja mes partive politike u arrit pas disa ditësh. Ceka tregon gjithashtu edhe për momentin kur i dha dorën Berishës para kamerës, por kjo nuk u dokumentua kurrë sepse nuk kishte kasetë.
“Ka një moment historik që unë i kam dhënë dorën, përpara kameras, por për fat kamera nuk kishte më kasetë… dhe nuk e filmoi momentin që unë i dhashë dorën dhe thashë Doktor hajde të bëjmë Shqipërinë”, rrëfeu Ceka.
Një moment tjetër që rrëfen ish ministri i rendit Neritan Ceka ka qënë ai kur ish Presidenti Sali Berisha braktisi takimin në Presidencë nga frika e bombardimit të “rebelëve të Jugut”!
“Në një moment që ishim në takim, Sali Berisha kërkoi leje për t’u larguar për një moment. U vonua shumë, gati një orë dhe ne pyetëm se “përse u largua Saliu dhe po vonohet kaq shumë”.
Një nga njerëzit aty tha se kishte dalë lajmi se rebelët kishin marrë aeroportin e Kuçovës dhe kishin vënë në punë avionët për të bombarduar Presidencën.
Ndaj iku Beriusha. ‘Po neve na la këtu për të vdekur?’, u thashë të pranishmëve”, kujton Ceka kohën e marsit 1997, kur po negociohej për të arritur marrëveshjen për daljen nga kriza.
g.kosovari
