Pavarësisht se ankohet për censurë dhe media të kontrolluara nga qeveria, Sali Berisha rezulton sërish si politikani që dominon hapësirën televizive në vend, bashkë me Partinë Demokratike.
Autoriteti i Mediave Audiovizive ka publikuar një raport monitorimi ku rezulton se në muajin dhjetor të vitit 2025, Partia Demokratike e Shqipërisë (PD) ka përfituar 84.20% të kohës totale televizive të dedikuar subjekteve politike në televizionet kombëtare. Në vend të dytë renditet Partia Socialiste (PS) me vetëm 11.14% të kohës televizive, një diferencë shumë e madhe krahasuar me opozitën. Partitë e reja dhe të vogla, nuk figurojnë dhe aq të pranishme në ekranet kombëtare.
Këto shifra tregojnë qartë se hapësira mediatike televizive është përqendruar pothuajse tërësisht mes dy forcave kryesore, me një avantazh të theksuar për PD-në.
Sa i përket liderëve politikë, të dhënat zyrtare tregojnë se Sali Berisha rezulton aktori politik më i pranishëm në media, me 34.87% të kohës totale, ndërsa Edi Rama e ndjek me 27.83%.
Pas 2 drejtuesve të partive kryesore në vend, më të shfaqurit në ekranet kombëtare rezultojnë krerët e grupeve parlamentare rë PD dhe PS. I pari është Gazment Bardhi me mbi 5% dhe i dyti është Taulant Balla me mbi 3%. Dy deputetët pasohen nga ish-deputeti demokrat Ervin Salianji, i cili gjatë dhjetorit fitoi kohë televizive kryesisht me Foltoren e tij kundër Berishës dhe kupolës së Partisë Demokratike.
