Një dalje nga pista që mund të ishte shndërruar në tragjedi. Ka ndodhur në orën katër të mëngjesit të sotëm, në aeroportin Orio al Serio në Bergamo, ku një avion Boeing 737-400 cargo, i cili vinte nga Parisi, humbi kontrollin dhe doli nga pista. Duke rrëshqitur, avioni gjigant shkatërroi rrethimin dhe doli në autostradë, ku për fat të mirë nuk kalonte askush në atë orë.
Zjarrfikësit kanë mbërritur shpejt aty dhe kanë konfirmuar se tre anëtarët e ekuipazhit ishin plagosur lehtë. Aeroporti u rihap në orën 6:47.
Një rast i tillë ka ndodhur më 1997 në Firence, kur një Atr 42 i Air Littoral përfundoi jashtë piste dhe doli në autostradë. Në incident humbi jetën komandanti dhe u plagosën disa prej 14 pasagjerëve.
d.i.
