Kompania BerALb përpiqet të përçajë sindikatën e punëtorëve, duke u përpjekur për të dytën herë që të rinisë punën me fuqi të reduktuar. Kompania zgjodhi 30 punonjës një javë më parë dhe, pas refuzimit të tyre, zgjodhi 30 të tjerë sot. Megjithatë, vetëm pesë u futën në ndërmarrje, ndërsa të tjerët refuzuan.
Sindikata e Minatorëve ka reaguar menjëherë, përmes kryetarit Vlash Tolana, i cili tha se BerAlb tentoi sërish të gënjente shtetin se rifilloi punë, por puna do të fillojë vetëm kur të jenë thirrur të gjithë punonjësit.
Lidhur me 5 personat që sot filluan punë, kreu i Sindikatës së minatorëve të Pukës lajmëroi përjashtimin e tyre. “Këta 5 punonjës nuk do të jenë më pjesë e Sindikatës dhe për rrjedhojë nuk do të mbrohen nga ana jonë, pasi thyen vendimin kolektiv”, tha Toplana duke shtuar se BerAlb do e ketë të vështirë të përçajë Sindikatën siç po tenton prej dy javësh.
Kompania BerAlb ndërpreu aktivitetin papritmas në 1 shtator në Minierën e Munellës dhe Fabrikën e Pasurimit të Bakrit në Fushë Arrëz. Për pasojë 250 punonjës mbetën pa punë, teksa filluan protestat.
Sindikatat e Pavarura të Shqipërisë pas protestave në Fushë Arrëz e Munellë njoftuan të tjera tubime, por kësaj radhe në Tiranë, para Ministrisë së Industrisë dhe Kuvendit, ku sipas kryesindikalistit, Gëzim Kalaja në mbështetje të minatorëve të Pukës do të ishin sindikalistë nga e gjithë Shqipëria.
