Një tjetër kabinet kardiologjie është vënë në funksion për banorët e kryeqytetit. Janë mbi 5500 pacientë të cilët kanë probleme me zemrën dhe 230 mijë banorë të Tiranës, të cilët kryejnë vizitat pranë Qendrës së Specialiteteve Nr. 3, do të marrin shërbim më të specializuar falë aparaturave të vendosura në këtë kabinet. Kështu, pacientët do të mund të kryejnë ekzaminimin e ekos kardiake, si dhe provat ushtrimore, apo të ekzaminohen me Holter tensioni arterial apo Holter ritmi kardiak.
Gjatë përurimit të këtij kabineti, Ministri i Shëndetësisë Ilir Beqaj ka theksuar se investimet e bëra në fushën e kardiologjisë pikërisht pranë Qendrave Shëndetësore kanë ndihmuar në diagnostikimin e hershëm të sëmundjeve kardiake. Nga ana tjetër ai theksoi se Ministria e Shëndetësisë është duke kryer një sërë investimesh tek kujdesi parësor duke u ofruar shërbim shëndetësor pacientëve pranë zonave të banimit.
“Unë besoj se ne vazhdojmë të demonstrojmë fuqizimin e kujdesit shëndetësor parësor dhe sidomos fuqizimin e kujdesit për sëmundjet kardiovaskulare. Ky është një angazhim programor dhe padyshim sëmundjet kardiovaskulare janë sëmundjet me barrën më të madhe të sëmundshmërisë në vend. Në Tiranë kemi praktikisht katër kabinete të tilla të cilat kanë filluar të funksionojnë prej disa javësh dhe bashkë me 11 kabinetet që janë në spitalet rajonale të vendit, pra kemi 15 kabinete që ofrojnë kujdes shëndetësor përveç kujdesit shumë më të specializuar që ofrohet në Qendrën Universitare “Nënë Tereza” ka pohuar ministri Beqaj.
Hapja e këtyre kabineteve pranë Qendrave Shëndetësore të Specializuara sipas Ministrit të Shëndetësisë ishte edhe më e nevojshme pas nisjes së kontrollit bazë falas për moshat 40-65 vjeç, pasi qytetarët të cilët rezultonin me probleme nga “check–up” duhet të vijonin të tjera kontrolle të specializuara. “Kabinetet u bënë edhe më të domosdoshëm për të vijuar zbatimin efektiv të kontrollit bazë. Pra nëse ne ofrojmë “check-up” për shumë shqiptarë, rastet kur nga “check-up” ka dyshime do të duhet të vijonin me trajtimin e mëtejshëm të ekzaminimeve, dhe ky kabinet është mishërimi i këtij vazhdimi të kujdesit,” ka pohuar Beqaj.
