Ministri i Shëndetësisë, Ilir Beqaj, i është përgjigjur sot deputetes Mimoza Hafizi e cila foli për koncensione të konstetsueshme. Sipas Beqajt, deputetët nuk duhet të fshihen pas fjalëve dhe të flasin për koncesionet në shëndetësi.
“Unë besoj se ju si deputete e Shkodrës duhet të ishit kujtuar shumë më parë që dializa e qytetit të Shkodrës duhet të ishte përmirësuar shumë më parë nga kushtet skandaloze ku është edhe sot, dhe se ç’ishte në shtator të 2013. Sigurisht, për fat të mire, nga 1 korriku, kjo situatë ndryshon falë këtij partneriteti publik privat, por që në fund të fundit, të njëjtat para që shpenzohen dhe sot për çdo seancë dialize do të shpenzohen edhe nga 1 Korriku e në vijim” – tha Beqaj në Kuvend.
Nga ana tjetër, ministri i Shëndetësisë shtoi se Hafizi para disa muajsh ka shprehur shqetësimin e kirurgëve se nuk ka shumë vëmendje për qytetin e Skodrës. Sipas tij, koncesioni i instrumentave e zgjidh përfundimisht këtë shqetësim.
“Sigurisht, që jam shumë i kënaqur që sot në Shkodër ka një rezonancë manjetike dhe shkodranët nuk vijnë më në Tiranë, madje ata të Tiranës shkojnë atje. Jam shumë i kënaqur që për herë të parë jashtë Tiranës në spitalet publike hemodinamika do të jetë edhe në Shkodër, dhe pikërisht në korrik do të fillojë edhe atje. Jam shumë i kënaqur që bëmë reanimacionin e kardiologjisë në atë spital, të pediatrisë dhe që kemi lidhur kontratën me një financim me Bankën e Këshillit të Evropës për reanimacionin e përgjithshëm. Janë më shumë se 4 milionë dollarë” – theksoi Beqaj.
(java / r.a)
