Ministri i Shëndetësisë, Ilir Beqaj, ishte sot i pranishëm në takimin e organizuar në kuadër të Ditës Botërore të ndërgjegjësimit kundër përhapjes së infeksioneve nga HIV/AIDS.
Në takim ishin të pranishëm një grup përfaqësuesish e aktivistësh të shoqërisë civile, në bashkëpunim me Zyrën e Përfaqësisë së Kombeve të Bashkuara në vend, Programin e Integruar të Telemjekësisë dhe Shëndetit Elektronik dhe USAID Albania.
Ministri Beqaj gjatë fjalës së tij tha se “nëse diagnostikohet në fazat e hershme dhe trajtohet me mjetet e duhura, dikush me HIV mund të jetojë po aq gjatë sa edhe dikush pa të,” ndërkohë që nënvizoi se dhe mitet apo stereotipitë e pengojnë diçka të tillë.
Ministri sqaroi se shumë njerëz kanë ende frikë të shkojnë për të bërë testet, ndaj sipas tij, kjo përbën një arsye se pse nuk arrihet të diagnostifikohet sëmundja që në fazat e hershme. Sipas tij, studimet tregojnë se një pjesë e konsiderueshme e njerëzve që jetojnë me HIV, nuk janë në dijeni të diçkaje të tillë.
“Ne duhet ta ulim në minimum këtë numër dhe t’u ofrojmë njerëzve trajtimin për të cilin kanë nevojë”, bëri thirrje ministri. Ndërkohë, në vendin tonë, në bazë të të dhënave të mbledhura e të raportuara nga ISHP-ja, deri në nëntor 2015, janë regjistruar 870 raste të raportuara me HIV-AIDS në Shqipëri.
Sipas tij, HIV-AIDS mbetet një fenomen ende urban në vendin tonë, pasi 72.8% e personave vijnë nga zonat urbane dhe 27.2% nga ato rurale. Për sa i përket shpërndarjes gjeografike, numri më i madh i rasteve, ose 48% e tyre, janë raportuar në Tiranë, më pas, me një diferencë të madhe nga Tirana, paraqiten Durrësi, Elbasani, Shkodra, Vlora, Lushnja. Vetëm në rrethet Pukë, Përmet dhe Kolonjë, nuk janë raportuar raste me HIV.
I pranishëm në këtë takim, David Saunders, Përfaqësuesi i Përhershëm i Kombeve të Bashkuara dhe Përfaqësuesi i UN Women, përgëzoi Qeverinë Shqiptare për miratimin e strategjisë së re për parandalimin dhe kontrollin e HIV/AIDS, dhe më e rëndësishmja, buxhetimin e saj, si dhe futjen e testit të shpejtë për HIV si pjesë e paketës bazë të Shërbimit Shëndetësor Parësor.
