Ben Blushi u takua sot me mbështetësit e tij në Korçë, në atë që ai e quajti si “një bisedë për Shqipërinë”.
“Nuk kam ardhur për miting, por për një bisedë mes miqsh”, tha Blushi.
Deputeti socialist theksoi se ky nuk është vendi që meritojnë shqiptarët. Sipas tij, Shqipëria ka nevojë për shpresë për t’u rregulluar.
“Fajin nuk e ka populli për gjendjen sot, por qeveria. Qeveria thotë ka punë, por shqiptarët janë dembelë. Unë nuk mund të pranoj këtë, duhet të reagojmë. Ky nuk është vendi që meritojmë. Jemi në mes të Evropës, i kemi të gjitha mundësitë. Nuk kam qëllim të ndaj partinë ku jam. Nuk më ftuan tek takimi i Ramës. Jam deputet i Elbasanit, por mua s’më ftuan. Nuk më ftojnë më. Me thonë s’ke të drejtë të zgjidhesh, unë s’kam hyrë në biznes privat dhe kjo parti është kthyer në një e tillë”, deklaroi Blushi.
Ben Blushi ka ndarë në takimin e tij të sotëm në Korçë edhe pikat kryesore të platformës së tij për kryetar të PS-së. Deputeti socialist është shprehur se nëse do të lejohet që të shpalosë platformën e tij në Kongresin e 19 Marsit se si mund të drejtohet më mirë PS-së ai do të kërkojë dekriminalizim të partisë, të financave të saj, kufizim të hyrjes së biznesmenëve të mëdhenj, referendum për çështje madhore, etj.
Korça është stacion i dytë i Blushit në këtë fushatë të tij për kryetar të PS-së, pas Kukësit, ku në fakt ai ishte për të promovuar edhe librin e tij, por jo vetëm.
