Kryeqyteti Belgjikës, Brukseli, prej disa ditësh ndodhet në një gjëndje “shtetrrethimi” nga forcat e ushtrisë. Në një deklaratë për median Kryeministri belg Charles Michel tha se gjëndja e lartë e alarmit do të qëndrojë e tillë, në nivelin maksimal 4, deri të hënën e ardhshme. Pjesa tjetër e vendit, përveç kryeqytetit, Brukselit, do të jetë në nivelin e alarmit nr 3. Kryeministri belg shtoi gjithashtu se duke nisur nga e mërkura shkollat dhe metroja e kryeqytetit do të rihapen. Kreu i qeverisë ka falenderuar qytetarët, të cilët sipas tij janë treguar të mirkuptueshëm nda masave ekstreme që janë marrë.
“Qeveria belge dhe populli belg janë duke u përballur me një situatë të vështirë dhe për këtë unë dua të falenderoj popullin për mirëkuptimin e tyre. Gjithashtu dua të falenderoj shërbimet tona të sigurisë, të cilët po punojnë mjaft fort”- ka thënë Kryeministri Michel.
Ndërkohë, kryeprokurori i Belgjikës në një deklaratë ka thënë se njëri nga 16 të arrestuarit e operacionit të ditës së djeshme në Bruksel, ka rezultuar si i lidhur me sulmet e 13 nëntorit në Paris. Kryeprokurori shtoi se 15 prej të arrestuarve janë liruar.
Sakaq, në Bruksel, tashmë prej ditësh pamja e kryeqytetit është e zbrazur nga aktiviteti njerëzor. Këto janë disa nga fotot që kanë kapur klimën në kryeqytetin e Belgjikës, ku duket qartë se në rrugë, qarkullojnë vetëm forcat e ushtrisë dhe policia.
