Preç Zogaj, president i Institutit “Gramoz Pashko” në rubrikën “Opinion” në News24 foli për zgjedhjet e 14 majit, ndërsa u ndal tek fushata e kandidatëve.
Zogaj komentoi fushatën elektorale të zhvilluar nga kandidatët për zgjedhjet e 14 majit, ndërsa u ndal te gara për kryeqytetin, teksa tha se kandidati i PD-së zyrtare, Roland Bejko po zhvillon nje fushate te larmishme me një synim: konturimin e trupës elektorale të PD qe ka si busull euroatlantizmin dhe djathtizmin demokratik, rritjen dhe përfaqësimin e kësaj trupe duke treguar dallimet e qarta me PS si kundërshtare politike dhe ideologjike e përhershme e PD-se dhe dallimet me Rithemelimin e Berishës gjithashtu për një çështje parimore siç është ajo e orientimit perëndimor dhe marrëdhënieve me partneret amerikane e europiane.
Bejko, tha Zogaj po shfaqet i qartë dhe i drejtpërdrejtë në fushatën e tij duke folur hapur, pa “i rënë nga Kina”, për korrupsionin, oligarkët, klientelizmin, betonizimin, ndotjen, e tjerë.
Sipas tij ka qenë “një ditë e trishtë” kur Berisha refuzoi propozimin e Alibeajt për të dalë në zgjedhjet e 14 majit me kandidatë të përbashkët, ndërsa e cilësoi PD-në e logos si lokomotiva duke shtuar se e djathta plurale mund të bëhet fituese nëse “vagonët”, pra, Rithemelimi i bashkëngjitet lokomotivës dhe jo zhdukja e lokomotivës.
Sakaq, ai foli edhe mbi rënien drastike që ka pësuar monedha europiane “Euro” kundrejt lekut në vend, teksa deklaroi se kjo ndodh për shkak të injektimit të parave të pista dhe që mund të sjellë zhvlerësim të mëtejshëm gjatë zhvillimit të fushatës elektorale.
Sa i përket posterave të Këlliçit që u komentuan gjerësisht në media, Zogaj deklaroi se janë thjesht elektoralë dhe nuk “janë për të vënë kujën” pasi në fushata ka edhe gjeste të tilla që mund të konsiderohen provokuese. Problemet e Këlliçit janë të tjera, tha ai.
“Bejko e ka treguar qartë se garën e ka me Veliajn dhe Këlliçin po ashtu. E ka me Veliajn si kryetar në fuqi dhe përfaqësues i PS-së që është kundërshtare politike e ideologjike e PD-së. Ndërsa gara e tij me Këlliçin ka specifikën se reflekton ndarjen që ka ndodhur në PD pas pezullimit që i bëri Basha Berishës me shpalljen e tij non-grata nga SHBA. Fushatat e Bejkos dhe Këlliçit kanë ngjashmëri në disa aspekte. Pak a shumë të dyja drejtohen kundër betonizimit dhe ndotjes së Tiranës, kundër fryrjes së administratës publike, kundër oligarkëve, monopoleve, etj. Kë një zë kundër inceneratorëve, një sërë temash. Bejko është shumë më i qartë dhe i drejtpërdrejtë, nuk i bie nga Kina. Kur flet për oligarkët i përmend me emra, lejet abuzive të ndërtimit i përmend me emra. Nga Kina i bien ata që flasin në mënyrë të rrumbullakosur, ngrenë probleme dhe nuk i konkretizojnë sepse me sa duket do prekin njerëz që i kanë në shërbimin e tyre. Përtej kësaj duhet të theksoj se është e qartë që Këlliçi, përfaqëson Rithemelimin dhe Partinë e Lirisë. Përfaqëson formacionin politik Berisha-Meta, kurse Bejko përfaqëson PD-në. Mes këtyre dy formacioneve ka ndryshim të madh. Nëse dallimi me PS-në është ideologjik, këtu kemi një dallim me orientimin se kujt do i përkasë qendra e djathtë në Shqipëri. Nuk do jetë kurrë fituese nëse nuk do jetë euroatlantike që nga kryetari deri te anëtari i fundit.
Për fat të keq sondazhet tregojnë se kandidatët e PS janë në avantazh në shumicë edhe pse fushata vazhdon dhe verdikti u duhet lënë kutive të votimit. Sondazhet kanë treguar megjithatë një lloj të vërtete. PD dhe LSI në vitin 2019 në bazë të sondazheve që zhvilloheshin ishte fituese në rreth 32-33 bashki. Këtu kanë ndodhur ngjarje ku personazhet drejtuese asokohe kanë bërë veprime që kanë zvogëluar PD-në dhe sot jemi në këtë situatë. Në parim nuk është e mundur të fitohen zgjedhjet duke u hedhur dorashkën partnerëve dhe duke pasur qëllime në kuptimin e sfidës ndaj partnerëve, ashtu si e zhvillon Rithemelimi me PL-në. Ka qenë ditë e trishtë kur Berisha refuzoi propozimin e Alibeajt për të dalë me kandidatë të përbashkët në zgjedhje. Opozita mund të zmadhohet kur pjesa e Berishës i bashkëngjitet PD-së zyrtare, por po t’i bashkëngjitet PD zyrtare Berishës nuk bëhet fituese. Duhet parë në këtë formë ky ekuacion. PD është si lokomotivë, Rithemelimi janë vagonët. Në këtë moment është e paqartë busulla e tyre dhe nëse bashkohen me lokomotivën, do ishte propozimi i Alibeajt. Përmes këtij bashkimi besoj se opozita do fitonte shumicën e bashkive, kurse kështu aktorët kryesorë të opozitës po tregojnë egon e tyre. Berisha nuk deshi bashkimin, besoj se do fitoren, por vuri në plan të parë zhdukjen e PD-së zyrtare. Mendoi se nëse do pranonte këtë propozim do mbetej pa zgjidhur çështja e logos së partisë. Ai vuri në plan të parë luftën e brendshme para ambicies për të fituar. Ka një arsye që shpjegon ndarjen, ka botëkuptime të ndryshme, por rruga e fitores është lidhja me lokomotivën që ka drejtimin euroatlantik. Nëse ka njerëz që bëjnë sikur nuk e kuptojnë këtë, këtu do ketë një mazhorancë jo euroatlantike. Fati i vendit tonë lidhet ngushtë me koalicionin dhe aleancën me vendet e familjes euroatlantike.
Ato posterat e Këlliçit për mua janë elektoralë, nuk kam parë ndonjë gjë për të vënë kujën, madje të fundit janë të bukur. Ka gjithmonë në fushatë edhe gjeste që krijojnë provokime, por nuk e shoh si problem dhe është bërë zhurmë e madhe. Duhet të ketë transparencë nga kandidatët në lidhje me jetën dhe të kaluarën e tyre, por unë nuk kam ndonjë rezervë të madhe për Këlliçin për këtë gjë.
Rënia e euros ka të bëjë me hedhjen e eurove në fushatë. Në fazën finale ndikon më shumë dhe besoj se ky zhvlerësim do jetë i përshpejtuar pasi paratë i hedhin në ditët e fundit. Këtë frikë e kam. Është e qartë se këtu janë injektuar në sistem shuma të mëdha në euro që janë kryesisht para informale dhe të krimit të organizuar por edhe që hidhen për qëllime elektorale. Ky zhvlerësim i përshpejtuar është produkt i injektimit të parave të pista në sistemin tonë financiar”, u shpreh Zogaj./m.j
