Kritikave të deputetit të Partisë Socialiste Ben Blushi, ka menduar që t’u përgjigjet këtë radhë deputeti i selisë rozë i qarkut të Beratit, Eduard Bejko. I pyetur nga gazeta Panorama, Bekjo mendon se nëse Ben Blushi nuk është dakord me qeverinë, nuk ka kuptim që ai të qëndrojë më në grupin e PS.
Sipas tij, momenti kur Blushi i bën kritika qeverisë i shërben më shumë opozitës. Ashtu si dje në sallën e Parlamentit, Bejko i kërkon kolegut të tij që, përveç kritikave, të ofrojë dhe alternativat e zgjidhjes së vështirësive.
“Po të mendosh hollë, ka elementë që i shkojnë për shtat opozitës me këto qëndrime. Mendoj se Ben Blushi duhet të jetë më racional për kohën dhe vendin ku i thotë këto deklarata. Kuptohet se nëse nuk është dakord me këtë mazhorancë dhe me këtë qeveri, nuk ka kuptim edhe bashkëjetesa. Ç’kuptim ka të jesh në një familje kur mbahen këto qëndrime?! Blushi si pjesë e familjes socialiste, duhet që përveç kritikave të japë dhe zgjidhjet, cilat janë zgjidhjet sipas tij për të përmirësuar këto defekte.
Të gjithë e dinë se si u mor shteti dhe ekonomia, dhe prandaj mazhoranca u votua, për ta nxjerrë vendin nga kjo situatë. Atëherë hajde të ulemi dhe të diskutojmë bashkë se çfarë mund të bëhet më mirë, jo të flasësh në media siç bën opozita dhe Berisha. Edhe opozita evidentuese është. Ben Blushi mund t’i thotë kritikat e tij edhe në mbledhjet e Grupit Parlamentar, por aty nuk flitet”, thekson Bejko për “Panorama”.
Redaksia Online
(JavaNews.al)
