Mesfushori kosovar i Përfaqësueses së Zvicrës, Valon Behrami, është “një mijë për qind” i sigurt se nuk do të luajë për Kosovën, kur kjo e fundit do të pranohet në UEFA dhe FIFA. Për më tepër, Behrami ka thënë se jo vetëm ai, por është i sigurt se as kosovarët e tjerë që aktivizohen te Zvicra: Xherdan Shaqiri, Granit Xhaka e Shani Tarashaj nuk do të luajnë për Kosovën. Kosova pret që në maj të pranohet në UEFA e FIFA, ndërsa në shtator të nisë eliminatoret për botërorin “Rusia 2018”. Por, Behrami në një intervistë dhënë “20min.ch”, ka folur edhe në emër të kosovarëve të tjerë te Zvicra, transmeton Koha Ditore.
“Jo”, ka qenë përgjigjja e Behramit pyetjes nëse Zvicra duhet të frikësohet për humbjen e futbollistëve të vet me prejardhje nga Kosova.
“Unë jam një mijë për qind i sigurt se nuk do të luaj për Kosovën, sepse jam 30-vjeçar. Gjithashtu kam dëshirë të luaj për Zvicrën. Megjithatë, edhe të tjerët nuk do të ndryshojnë ekip. Ata janë rritur këtu dhe qëllimi i tyre ka qenë gjithmonë për të luajtur në ekipin kombëtar (Zvicrës v.j.). Ne gjithmonë kemi marrë pjesë në gara të mëdha që nga viti 2004 me përjashtim të evropianit të vitit 2012, nga të cilat Kosova është ende larg”, ka theksuar Behrami.
Behrami ka thënë se as prindërit e futbollistëve kosovarë nuk u bëjnë presion atyre për të zgjedhur Kosovën për shkak se gjysmën e jetës së tyre e kanë kaluar në Zvicër dhe tashmë janë integruar në këtë shtet. Mesfushori i Watford-it, ka thënë se Përfaqësuesja e Kosovës mund të bëjë ekip të fortë, por njëherë për njëherë kjo nuk është e mundur. Ai ka shtuar se do ta ndihmojë Kosovën në procesin e formimit të ekipit nëse i kërkohet një gjë e tillë nga Federata e Futbollit e Kosovës (FFK).
“Mund të ketë ekip të fortë, por jo për momentin. Ka shumë lojtarë të mirë, por ata jetojnë në vendet e tjera, si Suedia e Finlanda dhe gjithashtu luajnë për këto shtete. Kosova duhet të formojë bazën e ekipit sikurse Zvicra para 15 – 20 vjetësh dhe pastaj të ftojë futbollistët e caktuar. Rinia në Kosovë ka nevojë për perspektivë dhe synime”, është shprehur Behrami.
Behrami është pjesë e Përfaqësueses së Zvicrës prej vitit 2005 dhe deri më tash, ai ka zhvilluar 63 ndeshje dhe ka shënuar dy gola. Gjatë karrierës, Behrami ndër të tjera, ka luajtur te skuadrat si Hamburg, Napoli, Fiorentina, West Ham United, Lazio, Verona e Genoa.
