Eurodeputetët e djathtë austriakë, Othmar Karas dhe Lukas Mandl kanë deklaruar për median austriake se Bashkimi Europian duhet të marrë parasysh rekomandimin e Komisionit Europian dhe të hapë negociatat me Shqipërinë dhe Maqedoninë e Veriut.
Pasi Komisioni i BE-së lëshoi rekomandimin për hapjen e bisedimeve të pranimit për dy vendet e Ballkanit Perëndimor, parlamentarët europianë të Partisë Popullore Austriake (ÖVP) kanë kërkuar që të mbahen premtimet. “Ne duhet të eksportojmë stabilitetin në mënyrë që të mos importojmë paqëndrueshmërinë”, deklaruan ata në median austriake “Vienna International News”.
“Është e qartë se vendet e Ballkanit Perëndimor duhet vazhdimisht të zbatojnë reforma me një ndikim më të të gjerë, veçanërisht në fushën e drejtësisë, të drejtave themelore, mbrojtjes së pakicave, luftës kundër korrupsionit dhe krimit të organizuar.
Duke hapur negociatat me këto dy vende, ne mund të përforcojmë përgjithmonë vlerat europiane dhe miqësinë e ndërsjellë në Ballkanin Perëndimor. Nëse BE nuk ndërmerr hapin e radhës, ndikimi i Rusisë, Kinës apo vendeve të tjera mund të kërcënojnë të ardhmen tonë”.
Deklarata e dy europarlamentareve austriak vjen në të njëjtën ditë kur diplomacia polake ka inicuar një nismë e cila kërkon nga Ministrat e Jashtëm të vendeve anëtare të BE të nënshkruajnë një deklaratë të përbashkët që negociatat për Shqipërinë dhe Maqedoninë e Veriut të çelen në muajin qershor.(Shqiptarja)/l.m
