Bashkimi Evropian është angazhuar të bashkëpunojë me qeverinë e re turke, pas zgjedhjeve të së dielës shënuar nga një epërsi e ndjeshme e partisë së presidentit Rexhep Tajip Erdogan, duke pritur sot raportin e parë rreth përfundimeve të arritura nga vëzhguesit ndërkombëtarë mbi eçurinë e procesit zgjedhor.
“Zgjedhjet e së dielës në Turqi u shënuan nga një përqindje e lartë e pjesëmarrjes në votim, duke konfirmuar angazhimin e popullit turk për procese demokratike”, njoftoi nëpërmjet një komunikate të shkurtër Shefja e diplomacisë evropiane, Federica Mogherini dhe Komisioneri për Zgjerim, Johannes Hahn.
“Bashkimi Evropian do të punojë me qeverinë e re për përmirësimin e frymës së partneritetit me Turqinë dhe do të vijojë në avancimin e bashkëpunimit në të gjitha sferat kryesore në favor të qytetarëve”, pohuan të dy zyrtarët evropianë.
Me krizën migratore, BE-ja i ka shprehur Ankarasë kërkesën për të akomoduar një numër më të madh të kontigjentit të refugjatëve si dhe forcimin dhe mbikëqyrjen e kufijve në këmbim të mjeteve, të rinisjes së bisedimeve në lidhje me kandidaturën e saj në BE dhe një hapje për lehtësimin e sistemit të vizave.
ATSH
