Komisioni për Çështjet Europiane ka miratuar marrëveshjen e financimit me Komisionin Europian për programin operacional shumëvjeçar për punësimin e të rinjve në Shqipëri, në kuadër të IPA III, për periudhën 2024-2027.
Zëvendësministrja e Ekonomisë, Kulturës dhe Inovacionit, Olta Manjani, deklaroi se programi synon përfshirjen e plotë të të rinjve në tregun e punës, me fokus të veçantë te grupi NEET, të rinjtë që nuk janë në arsim, punë apo trajnim, të moshës 15-29 vjeç.
Manjani, në fjalën e saj tha se, kjo marrëveshje nuk është thjesht një dokument politik, por një ndër marrëveshjet më të rëndësishme që shteti shqiptar do te miratoje në lidhje me programin më të madh të punësimit të të rinjve.
“Programi operacional shumëvjeçar i cili mbështetet nga Bashkimi Europian, vendos në qendër të vëmendjes punësimin e të rinjve nëpërmjet programit të garancisë rinore”, theksoi zëvendësministrja.
Programi, me një vlerë totale prej 63,48 milionë euro nga të cilat 50 milionë nga BE dhe 13,48 milionë nga qeveria shqiptare, do të mbështesë tri fusha kryesore: rritjen e punësimit të të rinjve, përmirësimin e arsimit dhe formimit profesional, si dhe forcimin e kapaciteteve institucionale për zbatimin efektiv të programit.
