Bashkimi Demokratik për Integrim thyen heshtjen dhe i përgjigjet negativisht ofertës së kreut të PDSH-së, Menduh Thaçi për koalicion mes dy partive më të mëdha në kampin politik shqiptar në Maqedoni. Në një deklaratë ekskluzive për “Koha Ditore”, sekretari gjeneral i BDI-së, Abdilaqim Ademi hedh poshtë çdo mundësi për koalicion me rivalin e deritanishëm, duke i sugjeruar Thaçit që një gjë të tillë ta provojë me partitë e tjera opozitare dhe ato të posaformuara.
“Prandaj, apeli ynë deri te subjektet politike shqiptare në opozitë dhe të sapoformuara është që të bashkëpunojnë në mes tyre, le të bëjnë koalicion ose front opozitar, le të koncentrohet vota shqiptare në dy tabore ose fronte, sepse në këtë mënyrë jepet hapësirë për garë politike, për oferta dhe platforma, por gjithashtu kjo mundëson edhe koncentrimin e votës dhe valorizimin e saj në mandate”, shprehet Ademi për “Koha Ditore”. Kjo përgjigje vjen vetëm disa ditë pasi Menduh Thaçi në emisionin “Klick” në RTV 21 të Shkupit u shpreh i gatshëm që të ulen me Ahmetin dhe të nënshkruajnë një marrëveshje që para zgjedhjeve të 24 prillit.
Kohë më parë, kreu i PDSH-së, Menduh Thaçi u shpreh i gatshëm edhe për koalicion me partinë e porsaformuar “Lëvizja Besa” e cila po ashtu e refuzoi, ndërsa me RDK tanimë nuk ka asnjë shteg pas prishjes së koalicionit të vitit 2011 që zgjati vetëm disa ditë.
Me Lëvizjen për reforma në PDSH-së, Ziadin Sela, të dyja palët që në fillim kanë hedhur poshtë çdo mundësi përafrimi. Aktualisht, i vetmi kombinacion për koalicion është ai i partive të reja shqiptare dhe RDK-së. Kjo e fundit me Lëvizjen për Reforma në PDSH të udhëhequr nga Ziadin Sela, kanë formuar Aleancën për shqiptarët me të cilën do të garojnë bashkë në zgjedhje.
Disa herë LR-PDSH dhe RDK nga njëra anë dhe Lëvizja Besa nga ana tjetër kanë shprehur gatishmëri për afrim dhe bashkëpunim, por ende nuk ka një hap konkret drejt një koalicioni opozitarë.
