Kryeministri Edi Rama ka vizituar një familje fermere në Baldushk të Tiranës. Kryeministri është shtruar me familjen në një tavolinë në natyrë para serës duke folur për bujqësinë dhe krijimin e kooperativave. I pranishëm ka qenë edhe ish-ministri Saimir Tahiri dhe deputeti socialist Xhemal Qefalia.
“Ju keni bërë një gjë të jashtëzakonshme por është vetëm forca e familjes. Por, me këtë mbështetje ju bëheni biznes i qëndrueshëm”, iu drejtua Rama familjes, e cila nuk e kishte marrë ende certifikatën e tokës. Kryeministri më parë i ka kërkuar llogari kreut të PS-së Tiranë, Saimir Tahiri.
Rama: E ke marrë certifikatën e tokës?
Pronari i tokës: Jo akoma, kemi muaj.
Rama, Tahirit: Je interesuar për certifikatën?
Tahiri: Po jam interesuar dhe duhet një rifreskim kërkese.
Kryeministri Rama shkëmbeu edhe disa batuta me të moshuarin e kësaj familje. Kur po flisnin për tokat, fermeri i bën me shenjë Ramës duke i thënë “andej nga toka jote”, ndërsa ky i fundit i kthehet “Mos më bëj me dorë andej se na sheh qytetari dixhital. Se ato sarajet e mia në krahasim me këto tuajat janë dobët shumë. E thotë paske tokë edhe këtej, po dal me shtëpi gjithandej unë pastaj”.
Po ashtu kreu i qeverisë i kujtoi fermerit peshën e rëndësinë e gruas në familje duke i thënë: “Pas një burri të suksesshëm fshihet një grua e suksesshme, se po s’pate gruan e mirë, s’ecën as burri. Të të rrojë gruaja se është kryesorja. Ky është urimi më i madh që duhet t’i bëjmë njëri-tjetrit, vdekshim para grave”, tha ai shkruan BW.
Një nga pjesëtarët e familjes tregoi se ishte kthyer dy vite më parë nga Greqia për shkak të krizës. Nga ana tjetër Rama iu përgjigj se këtu numërohen vetëm ata që ikin jo ata që kthehen. “Këtu numërohen vetëm ata që ikin jo ata që kthehen. Por, ata që kthehen, kthehen me mend. Ike more eksperiencë dhe para dhe u ktheve. Këtu ke ardhur dhe je afendiko vetë”, i tha Rama fermerit.
