Policia italiane ka arrestuar 61 anëtarë të tjerë të dyshuar të mafies më të fuqishme italiane, Ndrangheta, në një seri bastisjesh në shtatë rajone. Ata dyshohen për krime, duke përfshirë mashtrimin, trafikun e drogës, depërtimin në qeveri dhe zhvatjen e fermerëve vendas.
Më shumë se 500 oficerë policie u përfshinë në operacionin, i cili synoi 167 persona në total, duke përfshirë dhjetëra që aktualisht janë në burg. Goditja ishte pjesë e një operacioni më të gjerë dhe që është në vazhdim për të goditur grupin.
Javën e kaluar, më shumë se 100 persona u arrestuan në të gjithë Evropën në atë që policia tha se ishte operacioni më i madh që ishte kryer ndonjëherë kundër ‘Ndrangheta’.
Dhjetë vende ishin të përfshira, me asete me vlerë 25 milionë euro të sekuestruara.
Hetimi zbuloi gjithashtu informacione të reja të rëndësishme për mënyrën se si funksionojnë disa nga nivelet më të larta të grupit, edhe gjatë pandemisë Covid.
Një nga bosët e saj të supozuar, Pasquale Bonavota, u arrestua në një katedrale në qytetin verior të Genovas muajin e kaluar.
Qindra mafiozë të tjerë të dyshuar dhe zyrtarë të korruptuar ose janë burgosur ose do të gjykohen për përfshirjen e tyre të dyshuar me familjen Mancuso. Është vetëm një nga 150 familjet që janë pjesë e rrjetit kriminal të Ndrangheta-s, i cili ka tejkaluar Cosa Nostra-n si grupi mafioz më i fuqishëm në vend dhe vepron në më shumë se 40 vende të botës.
Hetuesit italianë dhe belgë besojnë se grupi i krimit kontrabandoi afër 25,000 kg kokainë midis tetorit 2019 dhe janarit 2022 dhe dërgoi më shumë se 22 milionë euro nga Kalabria në Belgjikë, Holandë dhe Amerikën e Jugut.
/a.r
