Partia Socialiste ka mbledhur paraditen e sotme Kryesinë ku kanë diskutuar për Kongresin e PS ku do të zgjidhen anëtarët e tij.
Kreu i grupit parlamentar të Partisë Socialiste, Taulant Balla në përfundim të mbledhjes, ka dhënë një prononcim për mediat ku ka zbuluar atë se çfarë është diskutuar në atë takim.
Ai ka sqaruar se zgjedhjet parlamentare të përgjithshme do të mbahen në qershor të vitit 2021 duke shuar dyshimet se mazhoranca do të pranojnë zgjedhje të parakohshme.
“Me zgjedhjen e delegatëve të kongresit, jemi partia e parë në vend dhe në pjesë më të madhe me partitë e tjera në Europë, që kemi përfaqësuar idenë e një bashkëdrejtimi, për një përfaqësim të barabartë në strukturën organizative të partisë. Proces transparent në zgjedhjen e kandidatëve. Do kemi edhe disa rregullime në statut.
Në kongresin e partisë do miratojmë një axhendë të aktivitetit politik të PS, biem të gjithë dakort që gjithmonë në këto 29 vite kongreset e PS kanë qenë momente të rendësishme në jetën politike të vendit.
Në axhendën politike do ketë një lloj ndryshimi se nuk përmbyllet në 31 dhjetor 2020 por në 30 qershor të vitit 2021 afat në të cilin planifikojmë edhe zgjedhjet e përgjithshme parlamentare, kështu që unë do bie rehat për këtë pyetje për 13 muaj”, tha Balla.
Më tej ai shtoi se, “Nga strukturat e partisë kemi marrë një sërë kandidaturash në degën e partisë në Shkodër, jemi duke diskutuar dhe shumë shpejt do të kemi edhe aty një drejtues të PS që të përmbushë pritshmërinë e PS dhe popullit të PS-së. Pas 29 gushtit do të kemi Asamblenë e re kombëtare dhe kryesinë e re të partisë, dhe ai do të jetë momenti dhe në Shkodër të kemi një drejtues të ri politik”.
Për Bashkitë që kanë mbetur pa krtyebashkiakë, ai apeloi sërish Metën që të zgjohet dhe të respektojë Kushtetutën.
“Presidenti ka qenë dhe mbetet në moszbatim të detyrave kushtetuese që ka. Është vënë në dijeni nga prefektët e qarqeve lidhur me vakancën e krijuar. Presidenti duhet të zgjohet dhe të respektojë Kushtetutën” – tha Balla.
