Ekspertët e shohin si një mundësi të mirë për uljen e evazionit dhe burokracive, bashkimin e Drejtorisë së Doganave me atë të Tatimeve. Por bashkimi i këtyre dy institucioneve pritet të përfundojë vetëm pas një viti pasi kërkohen ndryshime ligjore dhe përshtatje sistemesh.
Ekspertë të njohur të fushës vlerësojnë bashkimin e Tatimeve me Doganat si një hap në uljen e burokracive ndaj biznesve edhe pse implementimi pritet të bëhet vetëm pas një viti.
Eksperti, Selami Xhepa, shprehet se një projekt i tillë ka qenë që në kohën e PD-së dhe realizimi do të ishte një mundësi për më shumë konkurencë.
Xhepa thotë se bashkimi i të dhënave është një mundësi për të luftuar informalitetin.
Xhepa: Argumenti i integrimit të këtyre dy institucioneve në një të vetëm lidhet në gjykimin tim edhe me luftën ndaj informalitetit dhe fakti që të dy trupat do të jenë në një të vetme mundëson kryqëzimin e informacioneve qoftë me importuesit, qoftë për prodhimin e brendshëm, ose e ndjek si të thuash operatorin ekonomik në të gjithë zinxhirin e tij deri në hallkën fundore deri tek shitja me pakicë. Në këtë kuptim do të krijonte më shumë mundësi për të luftuar evazionin fiskal dhe për të krijuar kushtet e një konkurence të ndershme në treg dhe rregulla të barabarta loje për të gjithë.
Agim Binaj thotë se me bashkimin e këtyre institucioneve do të marrë fund zvarritja e bizneseve të cilat do të marrin informacion në mënyrë më të shpejtë.
Binaj: Të gjithë janë përfitues në këtë mes sepse edhe ai që nuk është importues merr nga ky që është importues dhe kuptohet që edhe hallkat shkurtohen, dhe informacioni është më i saktë dhe nuk rrimë jo ka hyrë, jo nuk ka hyrë, por degët e tatim-taksave e marrin direkt informacionin sepse janë një Drejtori, janë një kulm. Nuk ka nevojë tani të sorollatet, të shkojë nga një Drejtori në tjetrën, të zvarritet problemi, zgjidhja e problemit, siç ka shumë raste të kësaj natyre. Ne jemi përplasur me këto.
Sipas njohësve të kësaj fushe, shtete si Sllovenia,Kroacia apo Mali i Zi e kanë të bashkuar sistemin e Tatimeve dhe Doganave dhe Shqipëria duke qenë një vend i vogël do ta kishte të domosdoshme një gjë të tillë./OraNews
