Qeveria shqiptare po planifikon një reformë të thellë në administrimin fiskal. Fjala është për bashkimin në një department të vetëm të doganave dhe tatimeve. Një grup ekspertësh me në krye drejtuesen e Tatimeve Brisilda Shehaj janë në Gjerogji për të marrë eksperiencën e këtij vendi në reformën fiskale. Lajmi konfirmohet për TemA TV edhe nga Ministria e Financave, e cila nuk dha hollësi të tjera. Por në fakt i gjithë procesi ka nisur më shumë se një vit më parë.
Një grupim ekspertësh i Institutit për Politika Publike e Mirëqeverisje, që drejtohet nga ish ministri i Financave Arben Malaj, po zbaton një projekt i cili mes të tjerave është i fokusuar edhe në këtë drejtim. Në një raport të këtyre ekspertëve të prodhuar për qeverinë thuhet se arsye e suksesit fiskal në Gjeorgji është se ‘Autoriteti tatimor ka evoluar ne nje nga organet me te forta ne sektorin publik pas bashkimit te doganave dhe departamenteve te taksave ne nje agjenci te vetme qeveritare. Duket se qeveria po përgatitet për të ndërmarrë këtë hap në një kohë që aksioni antiinformalitet dështoi dhe nuk dha ata rezultate që priteshin. Ajo që bie në sy është se gjithcka po bëhet në kushtet e mungesës së plotë të transparencës.
Askush deri më sot nuk i ka thënë publikut se përse pikërisht po merret përvoja e Gjeorgjisë, dhe jo e ndonjë vendi të Bashkimit Europian. Por gjithësesi, duke e parë se kush po e drejton procesin është e vështirë të thuhet se kemi të bëjmë me marrje të përvojës apo me një kopjim të thjeshtë. Ndërkohë prej muajsh dihet lajmi se kryeministri shqiptar ka kontaktuar si këshilltar për ekonominë, ish presidentin gjeorgjian, Sakashvilli./Tema
