Bashkia e Tiranës përmes një njoftimi për shtyp shkruan se janë marrë të gjitha masat e nevojshme për normalizimin e situatës së krijuar pas rënies së zjarrit në Shkozë, në barakat e komunitetit rom. Bashkia shkruan në njoftimin e saj se deri në saqrimin dhe zbardhjen e plotë të situatës janë ngritur disa çadra të reja pranë Qendrës Tranzitore të Emergjencave në Tufinë, ku dhe do të strehohen 11 familjet e prekura nga rënia e zjarrit.
“Deri në sqarimin e plotë të ngjarjes, Bashkia e Tiranës, në bashkëpunim edhe me Prefektin e Tiranës, ka ngritur disa çadra të reja pranë Qendrës Tranzitore të Emergjencave në Tufinë për strehimin e përkohshëm të familjeve të prekura nga zjarri, deri në gjetjen e një zgjidhje e qëndrueshme për sistemimin e tyre afatgjatë. Qendra Tranzitore e Emergjencave strehon tashmë, disa familje të komunitetit rom në ambiente të sigurta për ta dhe fëmijët e tyre.
Bashkia e Tiranës po punon për një plan konkret për përmirësimin e jetesës së banorëve të këtij komuniteti. Në kuadër të këtij plani, bashkia ka përfunduar procedurat për fondet e programit IADSA për ndërtimin e 60 banesave dhe programeve të përshtatjes për fuqizimin e familjeve të këtij komuniteti.”- shkruhet në njoftim.
Bashkia ka denoncuar gjithashtu aktet e dhunës ndaj punonjësve të policisë së shtetit dhe pronës publike. Në njoftim bashkia i referohet edhe deklaratave të përfaqësuesit të PD Leonard Olli, duke theksuar se është për të ardhur keq që opozita kërkon të përfitojë politikisht nga këto situata.
“Bashkia e Tiranës dënon çdo akt dhune të ushtuar sot ndaj punonjësve të policisë nga disa anëtarë të familjeve të komunitetit rom, si dhe dëmet e shumta materiale të shkaktuara ndaj banesave sociale, ku aktualisht jetojnë disa familje rome, të cilat kanë përfituar një banesë sociale me vendim të Këshillit Bashkiak të Tiranës, sipas të gjitha rregullave të përcaktuara për aplikim nga Bashkia e Tiranës.
Gjithashtu, Bashkia e Tiranës shpreh keqardhjen për deklaratat e këshilltarëve të Partisë Demokratike të cilët, si çdo herë tjetër, edhe në këtë rast shpejtuan të përfitojnë nga situata e familjeve të komunitetit rom në Shkozë për kapital politik. Gjatë 4 viteve të fundit, kur në krye të Bashkisë së Tiranës ishte vetë kryetari i PD-së, nuk dhanë kurrë asnjë zgjidhje konkrete për këto familje, duke i injoruar dhe nxjerrë në qiell të hapur për llogari të lejeve për pallate.
Inkurajimi i vandalizimit të pronës publike, sipas modelit të protestave të PD-së, për t’i marrë zgjidhjet me dhunë, nuk funksionon dhe nuk do të tolerohet në qytetin e Tiranës.”- përfundon njoftimi.
