Lulzim Basha, ka udhëtuar këtë të mërkurë drejt Dibrës. Sipas infromacioneve nga selia blu, kreu i PD-së, ka udhëtuar drejt Dibrës me kërkesë së degës dhe demokratëve të këtij qarku.
Kjo lëvizje e Bashës, vjen pak ditë pas mbledhjes së Këshillit Kombëtar, në të cilën kreu i PD u kërkoi të gjithë drejtuesve të ishin të gjithë sa më parë në terren, për të vijuar aksionin politik.
Një nga pikat kryesore të udhëzimeve të Bashës ishte puna për afrimin edhe të atyre demokratëve që sipas tij u përdorën nga aksioni politik i Berishës.
“Ata janë njerëz që kanë sakrifikuar dhe janë të zhgënjyer me ne. Por ne duhet të punojmë me ta, t’i bindim e të bëhemi bashkë”- tha Basha në mbledhjen e Këshillit Kombëtar.
Ndërkohë, një nga çështjet që do të jetë në qendër të axhendës politike të Bashës, është Aleanca Qytetare për Demokracinë, tashmë e miratuar nga Kuvendi Kombëtar i 18 dhjetorit si një organizatë partnere e PD, nëpërmjet të cilës synohet hapja e mëtejshme e PD dhe afrimin me grupe të ndryshme shoqërore.
Kujtojmë se PD, “zien” nga brenda që nga përjashtimi i Sali Berishës nga grupi Parlamentar i PD-së.
Që prej asaj dite, në selinë e PD-së, dy palët që nuk njohin njëra-tjetrën, përplasen në distancë, ku nuk kanë munguar edhe tonet e forcës.
Ndërkohë edhe demokratët janë ndarë në dy pjesë, në ata që iu bashkuan Kuvendit të Partisë Demokratike, që përjashtoi ish kryetarin Sali Berisha nga çdo funksion partiak, ndërsa ky i fundit thirri një referendum të anëtarësisë për shkarkimin e kryetarit të Partisë, Lulzim Basha, pas Kuvendit të 11 dhjetorit.
g.kosovari
