Kreu i Partisë Demokratike ka dalë sot në një konferencë për shtyp teksa ka komentuar punimet e Këshillit të Mandateve. Lulzim Basha tha sot se në një shfaqje makabër dhe të shëmtuar Saimir Tahiri kërcënoi prokurorët.
“Edi Rama i ka kërcënuar, pushuar nga puna dhe burgosur oficerët e policisë siç është rasti i Dritan Zaganit. Ndërkohë ka mbrojtur kriminelë si Habilajt. Dosja tregon sesi klani mafioz i Edi Ramës është kapur në trafik droge. A nuk është provë makina e ish-ministrit që është përdorur për trafik? A nuk është provë parcelat që mbroheshin nga policët dhe se trafikantët kontrollonin dhomën e radarëve? A nuk është provë sesi trafikantët blenin dhuratan për familjen e ministrit dhe se ai merrte 30 mijë euro? Kush ka sy në ballë dhe mend në kokë e kupton që kërkesa e Prokurorisë duhet pranuar menjëherë” – tha Basha.
Sipas tij, vetëm ata që janë të trembur nga anti-mafia italiane bëjnë sikur nuk i kuptojnë këto prova.
Basha tha se arsyeja pse Rama mohon këtë gjykim është e thjeshtë: Sepse është ai pas Tahirit dhe ka përfituar nga milionat e ardhura nga droga për të blerë vota.
“Në qeverinë e Ramës ka dy drejtësi; një që prish shtëpitë e qytetarëve dhe një për Saimir Tahirin” – tha Basha.
Ndërkohë kreu i PD tha se Edi Rama po i bën presion prokurorëve me anti-mitingje përpara selisë së Kuvendit.
/JavaNews/b.d
