Kryetari i Partisë Demokratike, Lulzim Basha deklaroi të martën se “një qeveri teknike do të ishte një garanci për realizimin e zgjedhjeve të lira dhe të ndershme”. Ai e vendosi këtë si kusht, por pa sqaruar se cili do të jetë hapi tjetër i PD nëse një qeveri teknike nuk krijohet.
Duke e konsideruar reformën zgjedhore si betejën e radhës për opozitën, pas miratimit të ligjit të dekriminalizimit dhe reformës në drejtësi, Basha deklaroi se janë të vendosur dhe nuk do të lejojnë me asnjë çmim prishjen e procesit të ardhshëm zgjedhor.
“Qeveria teknike është kusht i patejkalueshëm për realizimin e zgjedhjeve të lira dhe të ndershme”, tha Basha.
“Koalicioni ynë për zgjedhje të lira dhe të ndershme do të zgjerohet me faktorë politikë dhe jopolitikë, të grupeve të interesit, shoqërisë civile dhe medias. Unë po kërkoj kontributin e çdo force politike dhe opozita nuk paragjykon asnjë forcë politike që bashkëpunon për reformën në drejtësi. Unë kam përshëndetur LSI-në dhe në veçanti kryetarin e saj Meta për shërbimin e jashtëzakonshëm që i bëri vendit për insistimin dhe kalimin me konsensus të reformës në drejtësi dhe të njëjtën gjë do të kisha bërë për Edi Ramën, por ai u investua me mish e me shpirt kundër konsensusit për të rrezikuar reformën në drejtësi”, tha Basha.
