Kryetari i PD-së, Lulzim Basha ka tërhequr sërish vëmendjen sot, lidhur me situatën ekonomike në vend të cilën ai e përshkuan se është në një përeqësim të thellë. Sipas tij, ajo që vihet re është rënia e besimit të biznesit dhe konsumatorëve në nivele rekord poshtë mesatares historike.
“Ky është lajmi i fundit që përmbyll një javë raportesh dramatike. Banka Botërore, Freedom House, Dhoma Gjermane e Tregetisë, Departamenti Amerikan i Shtetit, Shoqata e Investitorëve të Huaj dhe së fundi Anketa e Bankës së Shqipërisë konfirmojnë atë që çdo shqiptar përjeton dhe ndjen përditë: përkeqësimin, thellimin e krizës, rënien ekonomike”, komenton Basha në një postim në rrjetin social FB.
Sipas tij, Rama, Koço, Beqja dhe Ahmetaj me shokë, të cilët janë shkaktarë të këtij përkeqësimi që për vete kanë grabitur mbi 1 miliard euro me taksa të larta e korrupsion në tendera dhe koncesione, nuk duan t’ja dinë, nuk duan ta shohin, nuk duan ta dëgjojnë.
“Hapi i parë në programin tonë për daljen nga kriza Rama dhe nxjerrjen e shqiptarëve nga varfëria ështe ulja e taksave, tarifave dhe faturave që do ti kthejë shqiptarëve dhe ekonomisë 1 miliard euro çdo vit. Liri për të punuar, prodhuar dhe ndërtuar mirëqënie për çdo shqiptar. Mbështetje dhe jo terror ndaj biznesit dhe fermerëve. Investime publike që ndihmojnë ekonominë dhe hapin vende të reja pune me paga më të mira. Bashkë do të ndërtojmë një ekonomi të fortë dhe një të nesërme të sigurtë për të gjithë”, ka theksuar Basha.
Por, sipas kreut të PD-së, për të mundësuar këto së pari duhet larguar me votë të lirë regjimi i korruptuar i gangsterëve dhe plaçkitësve.
(javanews.al)
