Pas kreut të shtetit, Ilir Meta, i cili sulmoi gazetarin Sokol Balla, kreu i PD Lulzim Basha ka shpallur armik disa portale. Më saktë RealStory.al, Gazetën TemA dhe JavaNews.al
Basha ka urdhëruar të gjitha strukturat e Partisë Demokratike që të refuzojnë debatet, diskutimet apo komentet publike për këto media.
Urdhri i Bashës, ashtu si herët e tjera, nuk mban as firmë as vulë, por që mediat e shkruara raportojnë se ai është dërguar me email tek të gjitha strukturat e PD.
Madje në sulmin e tij, kreu i PD arrin deri aty sa i përmend me emra konkretë mediat dhe deklaron se i shërbejnë propagandës antiopozitare, diversioneve dhe sulmeve kundër opozitës dhe lidershipit të saj?!
Shkresën e dërguar me email, e cila ka dy faqe, sipas gazetës Mapo, Lidershipi i Partisë Demokratike ua ka dërguar anëtarëve të Këshillit Kombëtar, Kryesisë, dhe ish-deputetëve. Bëhet fjalë për një memo, një material për qarkullim të brendshëm, ku jepen porosi lidhur me strategjinë e komunikimit.
Në shkresë flitet për sondazhet e PD dhe po ashtu jepen “këshilla” për qëndrimet politike mbi çmontimin e asaj që e quajnë propagandë të Edi Ramës.
Sipas Memos, mercenarët politikë janë ish-drejtues të lartë të PD, të cilët vihen në shërbim të Ramës, sa herë ai është në vështirësi, duke sulmuar Partinë Demokratike.
Email u është dërguar anëtarëve të Këshillit Kombëtar dhe forumeve drejtuese, me 23 gusht, ndërkohë që veç sulmeve ndaj Realstory, Basha ka vënë në shënjestër edhe dy portale të tjera.
“Për të sulmuar me shpifje dhe të pavërteta PD dhe lidershipin e saj, Edi Rama, pas konsultimit të madh të Mero Bazes dhe Skënder Minxhozit, prej shumë vitesh në shërbim të pushtet të Edi Rames, ka hedhur në skakierën antiopozitare edhe Sokol Ballën me portalin Realstory”, deklaron Basha në shkresën e tij.
Rasti i Bashës në lidhje me urdhrin mbi mediat e lira është i paprecedentë, aq më tepër pasi nuk jepet arsyeja konkrete.
