Kryetari i Partisë Demokratike Lulzim Basha ka takuar Kancelaren gjermane Angela Merkel, gjatë punimeve të kongresit të CDU-së, nga ku i ka shrehur shqetësimet e opozitës në lidhje me kriminalizimin e qeverisë shqiptare. Basha ka takuar po ashtu edhe Presidentin e Partive Popullore Europiane, Joseph Daul, kreun e Parlamentit të Gjermanisë Norbert Lammert e shumë zyrtarë të tjerë të lartë.
“Revolta popullore që ka shpërthyer në të gjithë vendin dhe numri i lartë i azilkërkuesve shqiptarë është dëshmia më e qartë e situatës së rëndë ekonomike, papunësisë që shtohet dhe dhunës qeveritare ndaj të pamundurve, theksoi zoti Basha.”- shkruhet në njoftimin zyrtar të PD.
“Të gjitha kategoritë shoqërore ndihen të goditura dhe të poshtëruara, theksoi kreu democrat, dhe ndaj vazhdimi i kesaj keqqeverisje është një humbje më e madhe, një kosto shtesë për vendin, për çdo familje, për çdo shqiptar dhe një rrezik i madh që i kanoset demokracisë dhe shtetit ligjor.
Kjo gjendje po shton revoltën dhe zemëratën popullore, e cila po përkthehet në protesta të njëpasnjëshme, tha zoti Basha, duke sjellë në vemendje pjesëmarrjen në mitingun madhështor të datës 8 dhjetor.”- shkruhet më tej në njoftim.
Bashkëbiseduesit janë interesuar dhe për ecurinë e procesit të dekriminalizimit, ligj për të cilin sipas zotit Basha pritet të miratohet së shpejti. Kryetari i Partisë Demokratike shprehu shqetësimin për zbatimin e tij nga kreu i Partisë Socialiste i cili është autori kryesorë i promovimit të personave të inkriminuar në poste të rëndësishme të administratës, qeverisë dhe në Parlament.
Kryetari i Partisë Demokratike pati një bashkëbisedim edhe me kancelaren Angela Merkel të cilën e falënderoi për mbështetjen e vazhdueshme që i ka dhënë Shqipërisë sikundër vuri në pah shpresën e tij se Gjermania do të jetë në mbështetje të ëndrrës europiane të shqiptareve ashtu siç mbështeti fuqimisht dhe liberalizimin e vizave.
