Në ditën e 21-të të protestës, pas fjalimit që mbajti te çadra, kryeopozitari Lulzim Basha zhvilloi një takim me përfaqësues të biznesit.
Ai tha se e djathta ka në plan reforma për ringjalljen e ekonomisë.
Basha deklaroi se Vettingu do kalojë sipas përcaktimeve të 22 korrikut. “Dështimi i reformës erdhi pasi u përjashtua opozita. 22 korriku përcakton rrugën e zbatimit”, tha ai.
Kreu i PD theksoi se lidhjet midis biznesmenëve dhe ministrave duhet të ndërpriten.
“Biznesmeni dhe ministri që ulen bashkë, njëri nga të dy do të qërohet. Ministri dhe biznesmeni që ulen bashkë, ulen për të bërë komplot kundër qytetarit, komplot kundër tregut. Kjo do të marrë fund. Cili është çelësi i prosperitetit të shoqërive evropiane? Stabiliteti? Jo. Është nënprodukti! Stabilitet ka pasur Shqipëria në 50 vite me Enver Hoxhën.
Nuk ka rëndësi stabiliteti që mbështetet në një lojë të pistës, pa rregulla, pa shtet ligjor, pa konkurrencë është vdekjeprurës. Kjo është arsyeja që ekonomia është në ngërç, biznesi qahet, pse investitorët i vënë notën zero dhe pse Shqipëria është në këtë gjendje katastrofike ekonomike, nuk ka konkurrencë. Politika duhet që sipërmarrjen ta konsiderojë një forcë më vete dhe jo subjekt për t’u bërë servil i pushtetit”, deklaroi Basha.
