Lulzim Basha ka vijuar edhe të shtunën paradite bashkëbisedimin me të pranishmit në çadrën e Partisë Demokratike.
Kreu i PD tha se në Kavajë asgjë nuk do të ndodhte përveçse një gare fasadë. Sipas tij, tërheqja nuk është dhuratë apo lëmoshë, por fitore e rezistencës së PD-së në këto 11 javë.
“Në një vend kaq të dashur si Kavaja, me kontributin e shquar në demokraci, u ngul krimi dhe Elvis Rroshi. Më në fund e detyruan të dorëhiqej. Pastaj kreu i inkriminuar i PS Kavajë dëshironte të kandidonte bashkëshorten e tij, por u tërhoq pas presionit të publikut. Paratë ishin ndarë dhe njerëzit ishin kërcënuar për 7 Majin. Bandat kishin bërë gjithçka gati për një masakër të vërtetë elektorale” – tha Lulzim Basha.
Sipas tij, këto fakte janë të ditura edhe nga ndërkombëtarët në Tiranë. Ai tha se askush nuk kishte ndërmend të vepronte.
“As Rama nuk kishte ndërmend të tërhiqej. Ambasadat në Tiranë heshtën, shpesh herë edhe pa deklarata fare. Asgjë nuk do të ndodhte por gjithçka u përmbys sepse e vetmja forcë që mund ta ndalë pushtetin e inkrimunuar janë shqiptarët e bashkuar” – tha Basha para takimit të së shtunës në çadër. /b.d
