Kryetari i Partisë Demokratike Lulzim Basha ka nisur turin e prezantimit të alternativës së demokratëve tek qytetarët që të gjykojnë platformën e PD-së.
Kryetari i PD-së, Lulzim Basha në takimin e sotëm me punëdhënës dhe punëmarrës të Vorës ka premtuar rritje e pagës minimale, ulje të çmimit të energjisë për familjet që konsumojnë më pak se 300 kë, pagesë nga buxheti i shteti të faturës së ujit dhe energjisë elektrike deri në 200 kw për familjet në nevojë ekonomike, ulje e çmimit të energjisë për biznesin, rishikim të reformës së pensioneve në funksion të interesit të qytetarëve, premtime te cilat janë disa nga pikat e platformës qeverisëse të Partisë Demokratike.
“Që t’ua bëjmë jetën pak më të lehtë gjithsecilit prej jush, e para është t’ju rrisim rrogën dhe ulim çmimet . Për shembull për energjinë elektrike, 56 për qind e shqiptarëve harxhojnë më pak se 300 kw. Po për këta 56 për qind që është pjesa më e varfër e shqiptarëve, çmimi është rritur. Do të ulim çmimin e energjisë për 30 kw e parë. Fatura e energjisë që do paguani për familjet tuaja do të jetë më e ulur. Po kështu fatura e energjisë për biznesin do të duhet të ulet sepse është rritur nga 9 lekë/kë orë në 14 lekë/kë orë”, tha Basha.
Basha theksoi se “Platforma për rritjen ekonomike, për hapjen e vendeve të punës dhe për vende pune me paga më të larta, është platforma e taksës së sheshtë 9 për qind, 9 për qind tatim mbi fitimin, 9 për qind kontributet shoqërore, 0 për qind taksë mbi dividentin, 15 për qind tatim mbi vlerën e shtuar”.
