Gjatë kohës që Rama fliste nga kongresi i PS në Durrës, Lulzim Basha u shpreh nga çadra e protestës se kryeministri i trembet gjykimit popullor me votë dhe se me asgjësimin e zgjedhjeve të lira e të ndershme po asgjëson Shqipërinë.
“Edi Rama i trembet gjykimit popullor me votë sepse s’di ti përgjigjet pyetjeve për 300 mijë vende pune, për subvencione, ndihmë ekonomike, arsim cilësor. Nuk ka mbajtur asnjë premtim. Nuk mbajti asnjë premtim sepse nuk u përpoq kurrë të mbante premtimet e tij. Kjo vetëm që të përfitojne pushtetaret kriminelë të kupolës së tij politike. Ky komplot ka rekrutuar me paratë e drogës lobiste që përpiqen ti shesin kryeqyteteve europiane dëngla dhe mashtrime për të asgjësuar të vërtetën e çdo shqiptari, të djathtë e të majtë. Nëse jo ti gënjejnë të paktën ti vënë në dyshim me qëllimin që në zyrat dhe mediat ku kanë akses, të injektojne jo të vërtetën, por genjeshtrën”, tha Basha.
Sipas Bashës, shkatërrimi nuk po ndalet në asnjë sektor, ndërsa asgjësimi i Shqipërisë po bëhet përmes asgjësimit të zgjedhjeve të lira e të ndershme.
“Vula me të cilen duan të asgjësojnë Shqipërinë është asgjësimi i zgjedhjeve të lira e të ndershme. Në funksion të kësaj kanë shpallur zgjedhje moniste sepse refuzojnë zgjidhjen që përcaktuan qytetaret shqiptar për të drejtën sovrane të votës së lirë”.
Basha ka ironizuar kongresin e PS në Durrës, duke u shprehur se po shpërndahen çmimet ‘Oscar’.
