Në një proncimin nga Kukësi, ku po vijon takimet me qytetarët në kuadër të aksionit opozitar, Kryedemokrati Lulzim Basha tha se i shpreh mirënjohjen e thellë të gjithë kuksianëve që refuzimin masiv që i bënë kryeministrit Rama më 30 qershor.
Basha ripërsëriti premtimin se me ardhjen në pushtet, do të heq taksën e Rrugës së Kombit ndërsa falënderoi qytetarët për atë që e quajti braktisje dhe injorim të Ramës në 30 qershor.
“Dua ti shpreh gjithë kuksianëve mirënjohjen tim të jashtëzakonshme në emër të Partisë Demokratike, në emër të opozitës për refuzimin masiv që i bënë regjimit të Edi Ramës më 30 qershor. Kukësi i ka prirë betejës për liri dhe demokraci, për mundësi të barabarta në ligj për çdo qytetar, revoltën kundër taksës së rrugës. Dua të rikonfirmoj vendosmërinë tonë për të hequr traun e rrugës së Kombit në javën tonë të parë në pushtet”, tha Basha.
Lideri i opozitës theksoi se qëllimi i aksionit politik është largimi i Ramës, dhe kthimi i pasurive publike të grabitura, tek qytetarët.
Në Kukës dhe Tropojë, kryetari i Partisë Demokratike, tha se qeveria e Ramës prodhoi më shumë varfëri për shqiptarët. Sipas tij gjendja ekonomike është e rëndë për shkak të përqendrimit të ekonomisë në pak duar klientësh dhe oligarkësh.
g.kosovari
