Kryedemokrati Lulzim Basha realizoi sot takimin me kryeministrin e ri të Kosovës, Albin Kurtin.
Me anë të një shkrimi në Facebook, Basha e cilësoi si “takim të ngrohtë” ku u diskutua për të gjitha zhvillimet e rëndësishme politike dhe rajonale.
Një prej pikave kyce të bisedës ishte ndalimi i largimit të rinjve nga vendi.
“Ngritëm gjithashtu edhe çështjen kritike, se si të ndalojmë largimin e dhimbshëm të kaq shumë të rinjve nga Shqipëria dhe Kosova. E sigurova kryeministrin Kurti se Qeveria e Kosovës, institucionet e Republikës së Kosovës dhe vëllezërit e motrat tona – qytetarët e Republikës së Kosovës – mund të vazhdojnë të mbështeten tek Partia Demokratike e Shqipërisë, sot si opozitë e fortë dhe e bashkuar, dhe nesër në drejtim të vendit, për t’i ofruar çdo ndihmë dhe për të marrë çdo vendim në mbështetje të Kosovës”, shkroi Basha.
Kryedemokrati e përfundoi postimin duke thënë se opozita do të jetë gjithmonë në krah të Kosovës së shenjtë.
/a.r
