Nga Korça, kryetari i Partisë Demokratike Lulzim Basha nisi turin e bashkëbisedimit me të rinjtë. Për kreun e demokratëve të rinjtë janë zemra e PD-së dhe si të tillë do të qëndrojnë në pararojë të betejës së 21 qershorit, për t’i kthyer shqiptarëve shpresën, punën dhe dinjitetin.
“Sa herë që dinamika e zemrës e Partisë Demokratike ka ndjekur rrahjet dhe ritmin e zemrës së rinisë, ne kemi dalë fitimtarë” theksoi zoti Basha
Basha theksoi se niveli i papunësisë tek të rinjtë është në shifra alarmante, dhe për këtë, vendit i duhet oferta e re e taksave të ulëta, e politikave te zhvillimit dhe e bashkëqeverisjes.
“Plaga e madhe që kemi, 40% e të rinjve të papunë nuk mund të mos jetë prioriteti ynë numër një. Shiko, çfarë rinie të aftë ka Korça! E pse është e nevojshme të merren kontigjente të krimit, si ai i akuzuari për përdhunim e të bëhet punonjës Tatimesh?! Sepse kjo qeveri nuk e njeh meritën, ky është problemi i madh, sepse kjo është një ndër rrënjët e së keqes. Ndalja e së keqes dhe ekuilibrimi i pushteteve janë zgjidhja. Nuk është zgjidhje të largohemi nga Korça, nuk është zgjidhje të largohemi nga Tirana, nuk është zgjidhje të largohemi nga Shqipëria” – u shpreh kryetari i Partisë Demokratike.
Nga ana e tij kandidati i PD për kryetar të Bashkisë Korçë tha se ka në prioritetet e tij nxitjen e zhvillimit ekonomik dhe mbështetjen e biznesit.
“Do të mbështes çdo iniciativë private për hapjen e vendeve të punës, për vende pune për të cilat ka nevojë ky qytet dhe nuk ka nevojë për kulla. Në Korçë, gjatë këtyre dy viteve janë mbyllur 2600 biznese të vogla e të mesme. Duke u mbyllur ato, kanë mbetur me mijëra familje të papuna, jo vetëm të bizneseve që janë mbyllur por edhe të të punësuarve aty. Sot po mbyllen e po largohen shumë njerëz të vetëpunësuar” – theksoi Gjergji Mero.
Basha: Vetëm se në 21 qershor, do dilni kampionë edhe ju, edhe doktor Halimi!
