Kreu i PD ka folur sot në çadrën e protestës duke e cilësuar qeverinë si të inkriminuar dhe që e ka shkatërruar imazhin e vendit në sytë e Evropës.
“Jam i sigurtë se Zoti na dëgjon dhe na mbështet sepse kauza jonë është e drejtë. E vërteta mbartet mbi shpatullat e njerëzve të ndershëm që vijnë çdo ditë në këtë tempull të lirisë” – tha Basha në çadër ku të pranishëm ishin sot studentët e Universitetit të Arteve.
Sipas kryedemokratit, të vetmit që nuk mund të hyjnë në çadër janë trafikantët dhe kriminelët.
“Ata e kanë shtëpinë 10 metra nga këtu, por jo shumë gjatë. Sepse do t’i heqim shumë shpejt. Ju e dini që në prill ka ca reshjë që njihen si Plakat e Prillit. Nuk ka prill pa plaka. Do të ikin edhe plakat e prillit” – tha Basha duke ironizuar qeverinë.
Lulzim Basha u shpreh se bashkimi i shqiptarëve për zgjedhje të lira sa vjen dhe bëhet më i madh.
“Kjo do të arrijë përmes qeverisë teknikë që do të kryejë detyrat e ngarkuara nga populli” – tha kreu i opozitës.
Një ditë më parë Lulzim Basha u kritikuar drejtpërdrejtë nga ministri i Jashtëm gjerman, Sigmar Gabriel. Ky i fundit tha se Berlini nuk e kupton bojkotin e opozitës, por kjo nuk e ndryshoi qëndrimin e Bashës. /javanews/b.d
