Kreu i Partisë Demokratike, Lulzim Basha, ka reaguar pas reportazhit të publikuar mbrëmjen e kaluar në televizionin italian “Rai3”, që fliste për trafikun e drogës në Shqipëri.
Në një dalje për mediat, Basha tha se është i tronditur nga të dhënat e publikuara nga italianët, duke shtuar se këtë vit sasia e kanabisit është 5 herë më e lartë se vitin e kaluar.
“Jam i tronditur nga dëshmitë e publikuara në Rai3. Sasia e kanabisit këtë vit është 5 herë më e lartë se vitin e kaluar. Krimi shqiptar ka ndërtuar celula në gjithë Evropën dhe Amerikën Latine. Organizatat shqiptare kontrollojnë gjithë trafikun e heroinës. Organizatat shqiptare janë kthyer në lojtarë të mëdhenj të trafikut, që e marrin në Evropë dhe e fusin në Shqipëri.
Krimi shqiptar është zhvilluar për shkak të pandëshkueshmërisë. Krimi ka kapur të gjitha nivelet e qeverisjes dhe ka mbështetjen e të gjithëve. Kriminelët e kërkuar në Evropë shëtisin të lirë në Shqipëri. Kjo po e kthen Shqipërinë në një shtet të falimentuar, që kontrollohet nga krimi. Çdo gjë është e financuar nga paratë e drogës”, tha Basha.
Kreu i PD u shpreh se në shtator Partia Demokratike do të paraqesë planin e saj për vijimin e betejës politike. Ai tha se për të luftuar krimin, amerikanët dhe partnerët europianë janë treguar të gatshëm ta ndihmojnë PD-në në platformën e saj.
/a.r
