Lulzim Basha u ndal në Rrëshen ku i bëri thirrje të gjithëve që të dalin në votime ditën e dielë.
“Të mos mbetet asnjeri pa votuar, se fryma është e jashtëzakonshme. Duhen çuar të gjithë në kutitë e votimit ditën dielë”, tha Basha.
Të dielën, tha Basha, mbyllet kapitulli i fjalëve boshe dhe hapet një tjetër që ka në vëmendje të rinjtë, sipërmarrjen dhe fermerët.
“Gjithë ky besim, gjithë kjo vendosmëri për të mbyllur njëherë e mirë kapitullin e së shkuarës. Jemi të vetmit me plan dhe zgjidhje për Mirditën. Me plan dhe zgjidhje për fermerët, për të rinjtë, për sipërmarrjen, për ata që kërkojnë dhe duan vende pune. Çdo gjë tjetër janë brroçkulla. Janë fjalë boshe si ajo që keni hequr 4 vite në kurrizin tuaj”, tha Basha.
Ndërsa në Rubik, teksa u ndal para një lajmërimi për kufizimin e furnizimit me ujë, Basha u tha banorëve që mos ta harrojnë këtë dhe çdo problem tjetër kur të gjenden para fletës së votimit.
“Pash letrën aty që tregonte ndërprerjen e orareve të ujit, sepse lejet e taksave shkuan të gjitha për rrush e kumbulla. Ju i dini këto fare mirë. Mbajini mend ditën e dielë kur të shkoni e të votoni. Kujtojani çdo votuesi të Rubikut që është ende i pavendosur, se katër vjet me premtime boshe e pa plan është arsyeja pse Rubiku, Mirdita dhe Shqipëria janë këtu ku janë sot. Ndaj fryma e fitores është shpërndarë në gjithë Shqipërinë, se shqiptarët e dinë që numri 6 është votë për veten e tyre”, tha Basha.
Nga Mamurrasi, ai prezantoi edhe një herë planin ekonomik dhe premtoi faljen e kamatëvonesave abuzive për të gjithë.
“Vetëm taksat e ulëta do thithin investime. Vetëm ulja e TVSH-së do të garantojë 400 milionë euro më shumë konsum, mesatarisht 400 euro për çdo familje. Ne do të falim kamatëvonesat abuzive për të gjithë qytetarët”, premtoi Basha.
ma.me
