Duke marrë fjalën në seancën përkujtimore për 70-vjetorin e pushkatimit të deputetëve nga regjimi komunist, kryetari i PD Lulzim Basha ka deklaruar se klasa politike duhet të bëjë më shumë për të hedhur dritë mbi të kaluarën e errët të vendit.
“Ne duhet të gjejmë dhe të identifikojmë të gjitha eshtrat e viktimave të komunizmit, të nderojmë martirët e pluralizmit shqiptar, të tregojmë krimet e komunizmit dhe historinë tragjike se si një popull i tërë ra në kthetrat e komunizmit, t’u presim rrugën njëherë e mirë drejtuesve të lartë komunistë nga drejtimi i vendit dhe të ndalojmë përdorimin e simboleve komuniste”, ka deklaruar Basha.
Ai ka bërë me dije se, PD do të kërkojë që në buxhetin e vitit të ardhshëm të përfshihet një fond për dokumentimin e historisë së krimeve komuniste.
“Historia e dhimbshme e diktaturës nuk duhet të përsëritet kurrë më. Ne duhet ta ndalojmë me çdo kusht e çdo çmim këtë gjë”, ka thënë Basha. /b.d
