Lideri i opozitës Lulzim Basha ka deklaruar se me Edi Ramën nuk mund të ketë zgjedhje vitin e ardhshëm, pasi sipas tij kryeministri vendit ka arritur të vërë në jetë planin për inkriminimin e vendit, e më së fundmi për “kanabizimin” e tij.
Duke ju drejtuar në Mat përfaqësuesve të PD-së në këtë zonë, Basha tha se dy janë kushtet e opozitës. Vijimi i mëtejshëm i dekriminalizimit dhe zgjedhjet e lira dhe të ndershme.
Më pas Basha është ndalur në atë që e quan si projektin fundor të Kryeministrit, kanabizimin e vendit.
Trafikantët i marrin gratë dhe të rinjtë si skllevër me sy të mbyllur dhe i çojnë të punojnë në arat e kanabisit, nën mbrojtjen e drejtuesve të policicë që ndajnë me ta paratë e drogës. Kjo gjendje- theksoi kryetari i Partisë Demokratike është pasojë direkte e inkriminimit të shtetit, shkruhet ne njoftimin e PD.
“I hapën dyert krimit, i kandiduan për deputetë, i futën në Parlament, i bënë kryetar bashkish. Por nuk u mjaftuan; i bënë drejtorë në administratë, i bënë shefa komisariatesh e drejtore krimesh si këtu në Burrel. Efekti kulminant i kësaj politike të pastër të inkriminimit të shtetit është mbulimi i gjithë sipërfaqes së vendit nga droga.
Mbulimi i vendit me drogë është projekt politik i Edi Ramës. Ky njeri jo vetëm nuk mbajti premtimet me të cilat erdhi në pushtet, por që ditën e parë i braktisi ato, nuk u përpoq t’i mbante, nuk kishte ndërmend t’i mbante. Çfarë kishte ndërmend e pamë. Tani që ditët e mandatit po i mbarojnë e kemi fare të qartë se çfarë kishte ndërmend. Kishte ndërmend që buxhetin ta mbante për vete dhe për një grusht miqsh. Kishte ndërmend që krimit që e solli në pushtet dhe e mban në pushtet t’i hapë dyert e drogës dhe popullin ta vinte përpara disa alternativave; varfëri, emigracion, burg ose argat në kooperativën e drogës të Edi Ramës me shokë.”- tha Basha.
Sot, tha Basha çdo shqiptar e ka të qartë se me Edi Ramën situata vetëm do të përkeqësohet. Në fund të mandati ai s’ka asnjë bilanc, prandaj shpreson që me paratë e drogës dhe shantazhin e krimit të grabisë votat e qytetarëve. Me Edi Ramën nuk mund të ketë zgjedhje, tha zoti Basha duke artikuluar kushtet e patjetërsueshme për opozitën.
“Dy janë kushtet të patjetërsueshme: zbatimin e ligjit të dekriminalizimit dhe zgjedhjet e lira dhe të ndershme.”- perfundon njoftimi i zyres se shtypit te PD./Java/a.k
