Nga Ura Vajgurore, ku prezantoi kandidaten Juliana Memaj, kryeministri Edi Rama i cilësoi si të neveritshme publikimet e përgjimeve nga Dosja 339.
Ai deklaroi se socialistët asnjëherë nuk e kanë penguar drejtësinë, ndërsa solli si shembull ish-drejtorin e PD-së, Arben Segjini.
“Asksuh nuk mund të thotë se ne kemi ngritur dorën ndonjëherë për të penguar drejtësinë. Askush nuk na ka parë duke marrë në mbrojtje ndonjë që duhet të përgjigjet para drejtësisë. Ndërsa ata që helmojnë çdo ditë gjakun e miletit, drejtorin e përgjithshëm të Tatimeve e kishin të dënuar me vendim gjykate dhe në arrest shtëpie, dhe drejtonte tatimet nga shtëpia” – tha kryeministri.
Rama komentoi edhe pretendimet e kryetarit të PD. Ai e ironizoi Lulzim Bashën duke u shprehur se është një nga kokrrat e tespijeve të Sali Berishës. Ndërkohë që për kryeministrin, akuzat e Bashës janë absurde përderisa ai vetë është nën hetim.
“Ata duan të bëjnë gjyqe publike si në kohën e luftës, pa prova dhe pa hetime. Më e bukura është që ai që i udhëheq këto procese nuk është person i dyshuar, por i akuzuar dikur nga Prokuroria me 270 faqe akuzë për korrupsion. Sot është nën hetim në SHBA për thuajse 1 milionë dollarë që nuk dihet se nga erdhën dhe kujt i shërbyen. Ky person del dhe kërkon revolucion moral. Plaku i marrë e ka Lulin një nga kokrrat e tespiheve të veta. Por si tespijet e plakut Mere, ashtu do t’i shpërbëhen edhe tespihet e plakut Sali” – tha Rama.
***
Nga Ura Vajgurore ku çeli fushatën elektorale, Edi Rama u shpreh se socialistët e kanë të lehtë për të arsyetuar pse kërkojnë sërish besimin e qytetarëve.
Gjatë fjalës së tij, kryeministri tha se bashkitë e drejtuara nga PS kanë bërë një progres të dukshëm gjatë mandatit që po mbaron. Ai kërkoi mbështetjen e qytetarëve për kandidaten Juliana Memaj, ndërsa shtoi se gara e 30 Qershorit është përtej emrave të përvetshëm.
“Problemi është sesi ne të gjithë sebashku do të zgjedhim mes rrugës së ideve dhe asaj të baltës dhe konfliktit në çdo ballafaqim” – tha Rama.
Ai shtoi se opozita përmes dhunimit të demokracisë synon të kthejë mbrapsht kohën dhe të varrosë reformën në drejtësi.
“Ata po kërcënojnë me popullin imagjinar nëpër protesta, që janë punonjës të bashkive të tyre. Ata mund të vendosin për ta vrarë veten politikisht, por për Shqipërinë nuk vendosin dot” – tha Rama.
