Nga Ylli Pata
Lulzim Basha ka arritur të ketë të gjithë establishmentin opozitar si atë që nuk pranoi të dalë nga Parlamenti, por edhe atë që ka jashtë tij, kundër tij por edhe qëndrimit të PD-së për çështjen me thelbësore politike në vend që është ndryshimi i sistemit zgjedhor dhe menaxhimi i zgjedhjeve.
Lulzim Basha lëvizur në mënyrë të sforcuar pasi për dy vjet rresht la aleatët e tij pezull, ndërkohë që i kishte premtuar të bënte reformën zgjedhore dhe në fund iku nga Parlamenti pikërisht kur ndërkombëtarët dhe vetë Edi Ramë i dhanë letrën e bardhë për të shkruar vetë Kodin e ri Zgjedhor, madje edhe ndryshimet Kushtetuese.
Dalja e kreut të PD-së dy ditë më parë përpara studentëve, ku tha se PD-ja do të marrë iniciativën për ndryshimin e studentëve, ishte një lëvizje për të dalë nga një rrethim ku tashmë nuk e kanë kryer kundërshtarët e Partisë Demokratike, por pikërisht opozita: ajo që tashmë ndodhet në Parlament, por edhe aleatët që Basha i mbajti me premtime dhe kanë djegur mandatet bashkë me të.
Deklarata e bërë në një takim të sajuar me disa studentë, duket më shumë një fakt i kryer që ndodhet në duart e të tjerëve dhe jo tek Basha, i cili ka shumë më pak gjëra në dorë se dy vjet më parë, ku pas çadrës bëri marrëveshje me Ramën, e ku një nga pikat e paktit të 17 majit ishte miratimi i një reforme zgjedhore.
Agron Duka, kreu i PAA-së, ka deklaruar hapur se do të hyë në zgjedhje nëse mazhoranca miraton reformën zgjedhore, kurse në një linjë të ngjashme kanë qenë edhe parti të tjera të vogla.
Por goditja më e madhe ka ardhur nga opozita parlamentare, apo fraksioni i PD-së që përveç se institucional ka edhe mbështetjen e ndërkombëtarëve. Nëpërmjet zërave të Rudina Hajdarit dhe Myslym Murrizit, ata kanë bërë të ditur se do të investohen fuqishëm në ndryshimin e Kodit Zgjedhor, drejt një sistemi demokratik që reformon edhe partitë politike.
Rudina Hajdari
Deputetja e Partisë Demokratike që refuzoi të lërë mandatin, ka deklaruar në një fjalim të fortë në Parlament këtë javë se ajo është kundër një pakti “nën tavolinë” për
reformën zgjedhore. Zonja Hajdari, me fjalë shumë të rrepta fshikulloi sekretarin zgjedhor të PS-së, Damian Gjiknuri, duke thënë se ajo ka tjetër konceptë sin ë formë, ashtu në përmbajtje.
Në formë, Rudina Hajdari, tha “meqenëse Komisionit të vjetër i ka përfunduar mandati të krijojmë një tjetër komision të posaçëm me kërkesën e 7 deputetëve të rinj. Të përgatisim kërkesën për ekspertë dhe teknikë të huaj nga OSBE/ODIHR, Komisioni i Venecias dhe nga KQZ që të bëhen palë dhe pjesë e kësaj reforme që do të kthejë sovranitetin e popullit në parlament dhe jo sovranitetin e kryetarëve të dy partive”. Që do të thotë, mandate për të bërë reformën nuk kanë më ata që janë jashtë Kuvendit.
Ndërkaq, Hajdari renditi 5 pika se si duhet të ndryshohet Kodi Zgjedhor, i cili duhet të ketë si bazë depolitizimin e komisioneve zgjedhre, lejimin e kandidatëve të pavarur, emigrantët në votime e Parlament, pika që janë në unision me ata që ka kërkuar SHBA dhe BE.
Rama
Ajo që duket ka irrituar Hajdarin ka qenë deklarata e Edi Ramës që PS-ja është e gatshme të negocojë edhe me opozitën jashtë Parlamentin për Kodin Zgjedhor, por edhe me vendimin për shtyrjen e afatit të Komisionit të Reformës Zgjedhore, i cili ka dështuar si pasojë e refuzimit të Bashës për të negocuar.
Murrizi
Edhe deputeti tjetër i PD-së në Kuvend ka kundërshtuar negocimin me ata që kanë lënë Parlamentin. Ai ka thënë
se është gati të votojë edhe pro Edi Ramës nëse ky i fundit prish sistemin politik aktual.
Murrizi, duke komentuar qëndrimin e PD-së se kërkon të negocojë për Kodin tashmë që kanë lënë Kuvendin deklaroi: “”Kjo është vdis pa të dua. Kur ishin brenda nuk u mblodhën, tani që dolën pas vdekjes politike të atyre, këta thonë hajdeni brenda. Janë katër qytetarë dhe tre parlamentarë, pasi Shehu dhe Mediu dhe të tjerët e PD-së janë qytetarë tani, nuk janë parlamentarë.
Kjo është dashuri pas vdekjes, çfarë doprodhim ligjor që të bëjë ky komision do të vijë tek ne. Si mund të votoj unë cdo lloj hamendësimi që mund të bëj cdo lloj qytetar?! Nuk më detyron Rama mund të votoj për këtë. Raporti që mund të prodhohet mund të kalojë me referendum ose nëse Rama mendon se do i bëjë 84 vota”.
Agron Duka
Kryetari i Partisë Agrare Ambjentaliste deklaroi të hënën e shkuar në Top Channel se ai është gati të hyjë në zgjedhjet vendore nëse Edi Rama do të ndryshojë Kodin Elektoral, duke prishur sistemin zgjedhor të vitit 2008 që u vendos ndërmjet Ramës dhe Berishës.
Kokëdhima
Edhe një nga zërat më të ashpër të opozitës, përkatësisht kreu i partisë “Zgjidhja”, Koço Kokëdhima, ka lëshuar dje fjalë të ashpra ndaj Lulzim Bashës.
Në një intervistë televizive në nevvs 24, Kokëdhima tha se “PD vijon të jetë e pasinqertë, Lulzim Basha është i
pasinqertë, vijon të bëjë të njëjtat hile që ka bërë Sali Berisha dhe Edi Rama.
Lulzim Basha edhe në këtë krizë është me afër qeverisë dhe Edi Ramës se sa popullit opozitar të Shqipërisë. Si mund të shkojë populli pas PD, kur edhe në këtë krizë ia ka me hile popullit se nuk ka projekt. Ai thotë të iki më parë Rama, një kërkesë shumë e drejtë, por duke u nisur nga realiteti politik, kur krijojmë një krizë, mendojmë edhe projektin si do zgjidhet kriza dhe ca do kërkojë kriza”.
Balli
Një nga aleatet më besnike dhe të vjetra të Partisë Demokratike, Balli Kombëtar që është forcë politike tradicionale ka qenë e ashpër pikërisht për Kodin Zgjedhor me Bashën dhe Partinë Demokratike. Adriatik Alimadhi, kryetar i Ballit Demokrat, njëkohësisht edhe deputet i Parlamentit, ka deklaruar se PD ka vjedhur votat e Partisë së tij dhe do të kërkonte ndryshime të thella në Kodin Zgjedhor.
Këtë e thotë edhe në një intervistë për Tema Javore.
Në këtë situatë, Lulzim Basha nuk ka shumë hapësirë për të imponuar qëndrimin e tij, ai është detyruar ose të ndjekë e negocojë me të djathtët për atë që thtë ndryshim sistemi, ose të bëjë si më 17 maj, por që tani nuk i ka mundësitë, pasi ka dalë vetë nga sistemi….
(TemA Javore)
