Në një dalje publike, Lulzim Basha tha sot se shqiptarët e braktisën maskaradën e organizuar nga Edi Rama.
Kreu i PD u shpreh se Partia Socialiste ka marrë më pak vota sesa në zgjedhjet e viteve 2015 dhe 2017.
Ai u shpreh se edhe vetë socialistët e braktisën procesin e votimit.
Sipas Bashës, asnjë qytetar nuk ka marrë pjesë në këto zgjedhje lokale, por ata janë punonjësit e administratës publike.
“U jap fjalën punonjësve të administratës se ne do t’ju çlirojmë shumë shpejt nga ky ankth. Ju do t’i shërbeni me dinjitet vetëm ligjit dhe jo pushtetit” – tha Basha.
Ai akuzoi edhe Komisionin Qendror të Zgjedhjeve. Sipas tij, regjimi po manipulon zgjedhjet. Kreu i PD shprehu mirënjohjen për shqiptarët që iu përgjigjën thirrjes së tij.
“Dua të falënderoj shqiptarët që braktisën masivisht dhe përbuzën Edi Ramën. Ju e bëtë këtë për familjen tuaj dhe Shqipërinë tonë” – tha Basha.
