Lulzim Basha dhe Monika Kryemadhi kanë dorëzuar mandatet e deputetëve të tyre në Kryesinë e Kuvendit.
Në dalje nga godina në fjalë, dy krerët e opozitës nuk kanë mbajtur fjalime.
Pas këtij akti, protestuesit e drejtuar nga Basha kanë kaluar nga pas Kryeministrisë për të dalë në unazë tek “ETC”.
Nuk ka një plan të qartë nëse ata do të grumbullohen në selinë e PD apo do t’i rikthehen sheshit para Parlamentit.
Kujtojmë se zyrtarisht, dorëheqjen nga mandatet nuk i kanë dhënë deputetët Myslim Murrisi, Rudina Hajdari dhe Lefter Koka.
***
Pas thirrjeve të Lulzim Bashës për të dorëzuar mandatet në Kryesinë e Kuvendit, masa e protestuesve i janë drejtuar pikërisht godinës në fjalë.
Por paralelisht në këtë godinë po zhvillohej edhe një takim mes Edi Ramës dhe Gramoz Ruçit.
Basha u shpreh në fjalën e tij se Rama ndodhej jashtë Tiranës, por në fakt mediat transmetuan plane se kryeministri ndodhej pikërisht në zyrën e kryeparlamentarit.
Ndërkohë forcat e policisë janë detyruar të krijojnë një perimetër të ri sigurie në Kryesinë e Kuvendit. Lulzim Basha ka qenë i pari që ka hyrë në ambientet e Kryesisë për të dorëzuar dorëheqjet e grupit të tij parlamentar.
Më herët kryetari i PD, teksa ka mbajtur fjalën e tij në protestën që po zhvillohej para Parlamentit, i bëri thirrje policisë që mos ta lejojë Edi Ramën të dalë nga Shqipëria, pasi është i pandehuri i popullit.
Ai tha se kryeministri është një Maduro i Ballkanit dhe se Partia Demokratike nuk do të lejojë që Kushtetuta të kthehet në letër higjienike.
“Nga sot unë jam qytetari i Tiranës në krahun tuaj dhe kundër qeverisë së krimit. Ne luftojmë për vendin tonë, sytë e Europës dhe partneritetit strategjik SHBA ndodhen këtu në këtë shesh. Unë besoj te demokracia e amerikanëve dhe te shteti së drejtës” – tha Basha.
Kreu i PD u shpreh se protestuesit përfaqësojnë popullin e lirisë dhe demokracisë.
“Ne nuk pranojmë kurrë një kryeministër bandit, të kapur në flagrancë duke vjedhur vullnetin e popullit. Ka vjedhur qytetarët që nuk paguajnë dot bukën e gojës për fëmijët e tyre. Rama përfaqëson sot llumin e shoqërisë” – tha kreu i opozitës.
/a.rada
